Фарзандларининг машҳур бўлишига катта ҳисса қўшган фидойи оналар (фото)

Ҳар биримиз яқинларимизнинг қўллаб-қувватлаши қанчалик муҳимлигини биламиз. Яхши сўз, эътибор ва сабр бизни буюк ишларга ундаши мумкин. Кўпгина машҳурлар таслим бўлмаган ва фарзандлари учун ҳамма нарсани қилган ота-оналари туфайли муваффақиятга эришган. Мисол учун, Леонардо Ди Каприонинг онаси ўғлини яхши мактабга олиб бориш учун ҳар куни 2 соатни йўлда ўтказган.

Кира Найтли ва Шерман Макдоналд

Киранинг онаси актриса ва ссенарист бўлган. У болаларини ёшлигидан театр ва балет билан таништирган. Болалигида Кирага дислексия ташхиси қўйилган, бу касаллик ўрганиш, хусусан, ўқиш ва товушларни таниб олишда қийинчиликларга олиб келади. Бу муаммо унинг карьерасига нуқта қўйиши мумкин эди.

Аммо касалликни енгишга унинг ота-онаси катта ёрдам берди. Кира у билан курашишни ўрганди, аммо ҳали ҳам ўқишга қийналади. Қизини рағбатлантириш учун Шерман уйга Эмма Томпсон асосий роллардан бирини ўйнаган «Андиша ва ғурур» мелодрамасининг сценарийсини олиб келади. Эмма Киранинг кумири эди, шунинг учун онаси унга актрисалар каби сценарийни ўқиб чиқишни таклиф қилади.

Ченнинг Татум ва Кей Татум

Болалигида актёрга ДФEС (диққат ва фаолликнинг етишмаслиги синдроми) ва дислексия ташхиси қўйилган. Унга мактабга бориш ҳақиқий азоб эди — ўқиш осон эмасди. Йигит ўзини спортга урди ва кетма-кет ҳаммасига қатнашди — футбол, ​​бейсбол, кунг-фу.

Ота-онаси эса ўғлига яхши таълим беришни хоҳларди, шунинг учун улар хусусий мактаб учун пулни аямадилар. Интервьюда актёр онаси унга: «Ҳамма нарсани губкадек шимиб ол», деб ўргатганини айтади. Ченнингнинг фикрича, у кўп нарсаларни «мактаб ва китоблардан кўра одамлардан ўрганган».

Райан Гослинг ва Донна Гослинг

Райан Гослинг ҳам болалигида китоб ўқишда қийналган. Болага ДФEС ташхиси қўйилган, мактабда масхара қилишган, дўстлари ҳам бўлмаган. Ўғлининг аҳволидан хавотирланган Донна ўғлига ўқишни ўргатишга қатъий киришади ва уни бир йил давомида уйда ўқитади. Кўп ўтмай, бола актёр бўлишга қарор қилади. Райан «Оскар» мукофотига номзод бўлганида интервью бериб, бу унинг ўзи ва севган одамлари учун қанчалик муҳимлигини таъкидлади. «Айниқса, онам учун, чунки у туғилганимдан бери мен учун курашган», — дейди у.

Николь Кидман ва Жанелл Энн Кидман

Биринчи фарзандига ҳомиладор бўлган актриса фаолиятини якунлашга қарор қилади ва онаси билан ўз режалари билан ўртоқлашади. Николь бутун вақтини болаларга бағишламоқчи эканлигини айтди. Аммо онаси бу борада қизини қўллаб-қувватламайди. Актрисанинг айтишича, онаси «олдинни кўра билган» ва қизига бундай қилмасликни маслаҳат берган. «Танффус қилиб, дам ол, лекин таслим бўлма», деган у. Николь онасининг маслаҳатига қулоқ солади ва фильмларда рол ўйнашни давом эттиради.

Актриса «Олтин глобус»га сазовор бўлганда онасига яна бир бор ўз миннатдорчилигини билдирди: «Менинг онам аёллар ҳуқуқлари ҳимоячиси бўлган ва мен шу ерда турганим учун унга раҳмат. Менинг ютуқларим унинг ютуқлари». Николга ўз карьерасини тарк этишга рухсат бермаган онаси туфайли бугунги кунгача актриса рол ижро этган фильмлардан завқланишимиз мумкин.

Леонардо Ди Каприо ва Ирмелин Ди Каприо

Актёр исмини онаси қўйган — аёл биринчи марта Леонардо да Винчи расмини томоша қилаётганда ҳомиласи қимирлаётганини ҳис қилади. Леонардонинг онаси бир нечта жойларда ишлаган, ўғли эса унинг қийинчиликларини кўриб, оиланинг моддий аҳволини яхшилашни ва актёр бўлишни орзу қилган.

У эришган ютуқларини онаси билан боғлайди. Улар болаликдан бери яқин. Ўғли яхши билим олиши учун аёл уни бошқа тумандаги мактабга беради. У ерга бориш учун 2 соат вақт кетарди, лекин Ирмелин ўғли учун ўзини аямай қаттиқ меҳнат қилади. «Агар онам бўлмаганида мен бу ерда турмаган бўлардим», — дейди актёр.

Энн Хэтеуэй ва Кейт Хэтеуэй

Энн Хэтеуэй ҳам доим ота-онасидан миннатдор. Қизнинг онаси ҳам актриса бўлган ва айнан унинг роллари кичкина Эннни саҳна ҳақида ўйлашга мажбур қилган. Аммо ўша вақтда Энн саҳнага чиқишга рухсат сўраганида, ота-онаси қатъий «йўқ» дейишади. «Биз унга у ҳали бола экани, ўйнаб-кулиши кераклигини тушунтирдик», — деб эслайди Кейт.

«Олтин глобус» маросимидаги тантанали нутқида актриса бу ролга уни илҳомлантиргани учун онасига миннатдорлик билдирди.

Билл Гейтс ва Мери Гейтс

Миллионернинг онаси ўғлининг келажагига яхшигина таъсир ўтказган. 1991 йилда 35 ёшли Билл Гейтс онаси учрашишни талаб қилган йигит билан кўришишни истамайди. «Онам менга қўнғироқ қилди ва бир неча киши, жумладан Уоррен Баффет билан гаплашиш учун ёзги уйимизга келишимни сўради. Мен рад этдим: чунки у одамлар мени қизиқтирмасди. Аммо охир-оқибат мени кўндирди», — дейди Билл.

Гейтснинг сўзларига кўра, у муваффақиятга ота-онаси туфайли эришган. Унинг онаси Microsoft компаниясини олдинга силжитишга ёрдам берган келишувда муҳим рол ўйнаган. Тадбиркор, шунингдек, муваффақиятга эришишга ёрдам берадиган бир қанча муҳим нарсаларни ҳам санаб ўтади. Боланинг ота-онаси унга хайриянинг қийматини тушунтириб, болалигиданоқ жамоатчилик ишларига ўргатган. Шунингдек, улар ўғлига тўла эркинлик бериб, биринчи марта ҳеч нарса натижа бермаса ҳам, бошлаган ишини ташламасликка ундашган.