Катта миқдорда электр энергияси ўғирлаган Поп тумани ҳокимининг ўғли яна қамоққа олинди. Бу ҳақда “Дарё”нинг Наманган вилояти судидаги манбаси хабар берди.
Маълум қилинишича, ушбу иш вилоят прокурори ўринбосарининг протестига асосан Наманган вилоят судининг тафтиш инстанциясида кўриб чиқилди.
Гумонланувчини озодликка чиқариш ҳақидаги вилоят суди ажрими бекор қилинди ва унга икки йил озодликдан маҳрум қилиш тўғрисидаги туман судининг ҳукми кучида қолдирилди. Поп тумани ҳокимининг ўғли суд залидан қамоққа олинди.
Аввалроқ “Daryo.uz” сайтида катта миқдорда электр энергияси ўғирлаган Поп тумани ҳокимининг ўғли қамоқдан озод қилингани ҳақида ёзилган эди. Шундан сўнг “Кун.uz” сайтида ушбу жиноят иши худди шундай жиноятга қўл урган бошқа тадбиркор қамоқда қолгани, ҳокимнинг ўғли эса жазодан деярли қутилиб қолгани ҳақида мақола эълон қилинганди.
Бунга Наманган вилоят суди расмий муносабат билдирган эди. Унда ҳокимнинг ўғлига озодликдан маҳрум қилиш бўлмаган жазо тайинлашда унинг айбига иқрорлиги, жиноят оқибатида етказилган зарар қопланганидан ташқари Олий Мажлис Сенати аъзоси ҳамда Уйчи тумани фермер, деҳқон хўжаликлари ва томорқа ер эгалари кенгаши ҳамда маҳалла раисининг судга киритилган илтимосномалари эътиборга олингани айтилади.
Худди шундай жиноятда айбланган бошқа бир тадбиркор томонидан етказилган зарар қопланган бўлса-да, бироқ миқдори беш баробар кўплиги ва айбига иқрор бўлмагани унга нисбатан озодликдан маҳрум қилиш билан боғлиқ жазо тайинланишига асос сифатида кўрсатилади. Шунингдек, вилоят суди муносабатида суд ажримига нисбатан шикоят келтириш мумкинлиги ва белгиланган тартибда кўриб чиқилиши, суд ҳужжатларига фақат юқори суд инстанцияси ҳуқуқий баҳо бериш ваколатига эга экани ҳам билдирилган.
Наманган вилоят судининг ушбу муносабати ижтимоий тармоқда навбатдаги муҳокамаларга олиб келди.
Собиқ депутат ва жамоат фаоли Расул Кушербаев мазкур жиноят ишлари бўйича чиқарилган суд ажримларига билдирган муносабатда “Наманган суди раиси ва судьялари истеъфога чиқиши ва фаолияти текширилиши керак”лигини айтганди.
Судьялар олий кенгаши матбуот котиби Турсунали Акбаров эса “Дарё”нинг ушбу масала юзасидан сўровига: “Судьялар олий кенгаши суд ҳужжатларига ҳуқуқий баҳо бериш ваколатига эга эмас. Суд ҳужжатларига фақат юқори суд инстанцияси ҳуқуқий баҳо бериши мумкин”, дея жавоб берган эди.
Изоҳ (0)