Katta miqdorda elektr energiyasi o‘g‘irlagan Pop tumani hokimining o‘g‘li yana qamoqqa olindi

Katta miqdorda elektr energiyasi o‘g‘irlagan Pop tumani hokimining o‘g‘li yana qamoqqa olindi. Bu haqda “Daryo”ning Namangan viloyati sudidagi manbasi xabar berdi.

Maʼlum qilinishicha, ushbu ish viloyat prokurori o‘rinbosarining protestiga asosan Namangan viloyat sudining taftish instansiyasida ko‘rib chiqildi.

Gumonlanuvchini ozodlikka chiqarish haqidagi viloyat sudi ajrimi bekor qilindi va unga ikki yil ozodlikdan mahrum qilish to‘g‘risidagi tuman sudining hukmi kuchida qoldirildi. Pop tumani hokimining o‘g‘li sud zalidan qamoqqa olindi.

Avvalroq “Daryo.uz” saytida katta miqdorda elektr energiyasi o‘g‘irlagan Pop tumani hokimining o‘g‘li qamoqdan ozod qilingani haqida yozilgan edi. Shundan so‘ng “Kun.uz” saytida ushbu jinoyat ishi xuddi shunday jinoyatga qo‘l urgan boshqa tadbirkor qamoqda qolgani, hokimning o‘g‘li esa jazodan deyarli qutilib qolgani haqida maqola e’lon qilingandi.

Bunga Namangan viloyat sudi rasmiy munosabat bildirgan edi. Unda hokimning o‘g‘liga ozodlikdan mahrum qilish bo‘lmagan jazo tayinlashda uning aybiga iqrorligi, jinoyat oqibatida yetkazilgan zarar qoplanganidan tashqari Oliy Majlis Senati a’zosi hamda Uychi tumani fermer, dehqon xo‘jaliklari va tomorqa yer egalari kengashi hamda mahalla raisining sudga kiritilgan iltimosnomalari e’tiborga olingani aytiladi.

Xuddi shunday jinoyatda ayblangan boshqa bir tadbirkor tomonidan yetkazilgan zarar qoplangan bo‘lsa-da, biroq miqdori besh barobar ko‘pligi va aybiga iqror bo‘lmagani unga nisbatan ozodlikdan mahrum qilish bilan bog‘liq jazo tayinlanishiga asos sifatida ko‘rsatiladi. Shuningdek, viloyat sudi munosabatida sud ajrimiga nisbatan shikoyat keltirish mumkinligi va belgilangan tartibda ko‘rib chiqilishi, sud hujjatlariga faqat yuqori sud instansiyasi huquqiy baho berish vakolatiga ega ekani ham bildirilgan.

Namangan viloyat sudining ushbu munosabati ijtimoiy tarmoqda navbatdagi muhokamalarga olib keldi.

Sobiq deputat va jamoat faoli Rasul Kusherbayev mazkur jinoyat ishlari bo‘yicha chiqarilgan sud ajrimlariga bildirgan munosabatda “Namangan sudi raisi va sudyalari iste’foga chiqishi va faoliyati tekshirilishi kerak”ligini aytgandi.

Sudyalar oliy kengashi matbuot kotibi Tursunali Akbarov esa “Daryo”ning ushbu masala yuzasidan so‘roviga: “Sudyalar oliy kengashi sud hujjatlariga huquqiy baho berish vakolatiga ega emas. Sud hujjatlariga faqat yuqori sud instansiyasi huquqiy baho berishi mumkin”, deya javob bergan edi.