Avgust oyida Namangan viloyat sudining apellyatsiya instansiyasi sudlanuvchi G‘.S.ga nisbatan chiqarilgan hukmni o‘zgartirib, uni sud zalidan ozod etgani haqida xabar berilgandi. “Daryo”ning viloyat sudidagi manbasiga ko‘ra, sudlanuvchi Pop tumani hokimining o‘g‘li bo‘ladi.
Ushbu xabarlar yuzasidan Namangan viloyati sudlari matbuot xizmati munosabat bildirdi.
Maʼlum qilinishicha, haqiqatdan ham har ikki sudlanuvchi (Uychi tumanidagi “Jiydakapa Baraka Chorva” fermer xo‘jaligi rahbari G‘. Sultonov va yakka tartibda kulolchilik faoliyati bilan shug‘ullangan B. Abdullayev) Jinoyat kodeksining 169-moddasi 4-qismi “a” bandi (juda ko‘p miqdorda o‘g‘rilik qilish) bilan aybdor deb topilib, ularga birinchi instansiya sudi tomonidan ikki yarim yil muddatga ozodlikdan mahrum qilish jazosi tayinlangan.
Har ikki sudlanuvchiga doir jinoyat ishlari (jinoyat ishlari alohida-alohida yuritilgan) viloyat sudining apellyatsiya instansiyasida ko‘rilib, yakka tartibdagi tadbirkorga nisbatan chiqarilgan hukm o‘zgarishsiz qoldirilgan bo‘lsa, fermer xo‘jaligi rahbariga nisbatan tayinlangan jazo ozodlikdan cheklashga o‘zgartirilgan.
Munosabatda taʼkidlanishicha, har qanday jinoiy jazo sudlanuvchining shaxsi, jinoyatning ijtimoiy xavflilik darajasi, og‘irlashtiruvchi va yengillashtiruvchi holatlar va boshqa omillardan kelib chiqib tayinlanadi.
“Qayd etilgan jinoyat ishlariga kelsak, mahalliy amaldorning o‘g‘li ekani alohida taʼkid etilayotgan G‘. Sultonov elektr tarmog‘iga o‘zboshimchalik bilan ulanib, 200 million so‘mlik zarar yetkazgan bo‘lsa, yakka tartibdagi tadbirkor B. Abdullayev xuddi shunday xatti-harakati (gaz tarmog‘iga yer ostidan quvur tortish orqali yashirin ravishda ulangan) oqibatida yetkazilgan zarar 1 milliard 8 million so‘mni tashkil etadi. Ko‘rinadiki, zarar avvalgi jinoyat ishi miqdoridan besh barobar ko‘p.
Ikkinchidan, fermer xo‘jaligi rahbari bo‘lgan sudlanuvchi aybiga chin ko‘ngildan pushaymon bo‘lgan, zarar ham qoplangan, bundan tashqari Oliy Majlis Senati aʼzosi hamda Uychi tumani fermer, dehqon xo‘jaliklari va tomorqa yer egalari kengashi hamda mahalla raisining iltimosnomalari inobatga olinib, unga nisbatan tayinlangan ozodlikdan mahrum qilish jazosi ozodlikni cheklash jazosiga o‘zgartirilgan. Tarmoqlardagi ayrim muhokamalarda taʼkid etilayotgan jazodan butunlay ozod etilgani yo‘q.
Yakka tartibdagi tadbirkorning holatida buning aksi ko‘rinadi: u aybiga iqror bo‘lmay dastlabki tergov va sud majlislarida tekshiruvchilar aniqlagan yerosti tarmog‘i eski ekani, undan foydalanmagani haqida vajlar keltirgan. Uning vajlariga sud huquqiy baho berib, zarar qoplangan bo‘lsa-da, birinchi instansiya hukmini o‘zgarishsiz qoldirish haqida ajrim chiqargan”, deyiladi munosabatda.
Qo‘shimcha qilinishicha, “jinoyat ishlari tafsilotlariga hojat yo‘q, uning mag‘zini tashkil qiladigan yuqoridagi qisqa chizgilarning o‘zi ‘Bir xil jinoyat uchun nega ikki xil jazo?’ mazmunidagi savollarga javob uchun yetarli”.
“Yaʼniki, har ikki jinoyat uchun tayinlangan jazolar sudlanuvchilarning go‘yoki ijtimoiy mavqeyidan kelib chiqib emas, balki (viloyat sudi apellyatsiya instansiyasiga ko‘ra), qonun izn bergan doirada belgilangan. Biroq bu hukm qatʼiy, shikoyatga o‘rin yo‘q, degani emas, sud qarorlaridan norozi bo‘lganlar shikoyat qilish huquqiga ega va u belgilangan tartibda ko‘rib chiqiladi”, deyiladi Namangan viloyati sudi matbuot xizmati izohida.
Izoh (0)