Шимолий Корея томонидан учирилган чиқинди шарлари Жанубий Корея президенти қароргоҳи ҳудудига келиб тушди. Бу ҳақда Корея яримороли манбаларига таяниб, Reuters нашри хабар берди.
Жанубий Корея президентининг хавфсизлик хизмати хабарни тасдиқлаган. Чоршанба куни чиқинди шарлари президент идораси жойлашган мажмуа ҳудудига келиб тушгани хабар қилинган.
Дастлаб хавфсизлик хизмати президент қароргоҳи жойлашган Ёнгсан ҳудуди атрофида кўплаб шарларни аниқлашган. Улар тартибсиз равишда учиб қаттиқ қўриқланувчи муассасага яқинлашган ва ерга тушган.
Ҳарбийлар тезликда яқин атрофдаги ходимларни хавфсиз ҳудудга кўчирган ва шарларни текшира бошлаган. Текширув жараёнида ҳеч қандай заҳарли ёки портловчи моддалар, хавфли буюмлар топилмаган.
Шимол расмийлари чиқинди шарлари учиришдан мақсад Сеулнинг “провокациялари”га қарши туриш эканлигини билдирган. Жанубликлар томонидан Пхеньян назоратидаги ҳудудларга К-поп видеолари ва драмалари юкланган альбомлар, озиқ-овқат, дори-дармон, пул ва USB жамланмалар ҳамда Пхеньяндаги ҳукуматга қарши варақалар юборилиши жавобан Сеулга чиқинди шарлари “огоҳлантириш” тариқасида учирилгани маълум қилинган.
Жанубий Корея ҳарбийлари чиқинди шарларининг бир қисми ҳали ҳам мамлакат устида ҳаракатланаётганини билдирган. Улар кузатиб борилаётгани ва тез орада хавф бартараф этилиши маълум қилинган.
“Ҳозирги шамол йўналиши ғарбдан бўлганлиги сабабли жануб томонга учирилгани тахмин қилинган чиқинди шарлари Кёнгги вилоятининг шимолий қисмига қараб ҳаракатланмоқда”, дейилади Жанубий Корея Штаб бошлиқлари бирлашган қўмитаси баёнотида.
Маълумот ўрнида, 2022 йилдан бери Жанубий Кореяда президент идораси (қароргоҳ ва президент офисини ўз ичига олади) Сеулнинг марказий тумани Ёнгсанда жойлашган. Амалдаги президент Юн Сук Ёл ўнлаб йиллик анъаналарни бузиб, Корея президентларининг анъанавий саройи бўлган “Мовий уй”ни тарк этган ва қароргоҳини пойтахт марказига кўчирган.
Изоҳ (0)