Тошкент шаҳрининг Миробод тумани, Тарас Шевченко кўчасида 24/7 режимда фаолият юритувчи кўнгилочар (гастрономик) кўчани ташкил этиш бўйича ишларнинг иккинчи қисми давом этмоқда. Бу ҳақда туман ҳокимлиги матбуот хизмати хабар берди.
Маълум қилинишича, таъмирлаш ишлари олиб борилиши муносабати билан 27 ноябрдан Тарас Шевченко кўчасининг (94-умумтаълим мактабидан) Саид Барака кўчаси кесишмасигача бўлган 200 метр қисми 25 декабргача барча турдаги транспорт ҳаракати учун ёпилади.
Ҳайдовчиларга вақтинча айланма йўллардан фойдаланиш тавсия қилинган.
Гастрономик кўча
2024 йилнинг 27 февраль куни Президент бошчилигида Тошкент шаҳрида саноат, инфратузилма ва туризмни ривожлантириш масалалари муҳокама қилиниб, пойтахт ҳудудида “гастрономик кўча”лар ташкил этиш таклифи илгари сурилган эди. Шундан сўнг Миробод тумани Тарас Шевченко кўчаси гастрономик кўчага айлантирилиши ҳақида хабарлар эълон қилинди.
22 июль куни Миробод тумани ҳокимлиги Telegram каналида мазкур кўчанинг бир қисми барча турдаги транспорт ҳаракати учун ёпилгани билдирилиб, қурилиш ва таъмирлаш ишлари бошланди.
5 августга келиб бунёдкорлик ишлари давомида ёритиш устунлари, ўриндиқлар ва чиқинди урналари, декоратив дарахт кўчатларини ўтқазиш, суғориш тизимлари, аудио мусиқа тизимини ташкил этиш, декоратив арка ва устунлар, фотозоналар учун декоратив элементлар ўрнатиш, пиёдалар йўлаклари, велойўлаклар ва замонавий ўриндиқлар ташкил этиш, болалар ўйингоҳи ва кўргазмали саҳна ўрнатиш каби ишларни амалга ошириш режалаштирилгани ёзилди.
“Дарё” фотомухбири сентябрнинг илк кунларида ушбу кўчада бўлиб, ишларнинг боришини кадрларга муҳрлаган эди.
26-октябрь куни Тарас Шевченко гастрономик кўчасининг тантанали расмий очилиш маросими бўлиб ўтди.
Изоҳ (0)