Халқ депутатлари Тошкент шаҳри кенгашининг Саноат, транспорт, қурилиш, коммунал соҳа ва аҳолига хизмат кўрсатиш масалалари бўйича доимий комиссияси, шаҳар ИИББ ЙҲХБ ҳамда соҳага оид тегишли ташкилотлар мутахассислари билан биргаликда кенгашнинг 23 сентябрдаги «Тошкент шаҳрининг айрим кўчаларида транспорт воситаларининг юқори тезлигини соатига 60 километргача чеклаш масаласини кўриб чиқиш тўғрисида»ги қарори ижросини таъминлаш мақсадида пойтахт кўчаларида ўрганишлар ўтказди.
Саноат, транспорт, қурилиш, коммунал соҳа ва аҳолига хизмат кўрсатиш масалалари бўйича доимий комиссияси мажлисида мазкур масала атрофлича муҳокама қилинди. Халқ депутатлари шаҳар кенгашининг 70-сессиясида шаҳар ИИББ ЙҲХБ томонидан Амир Темур, Фарғона йўли, Шота Руставели, Янги Сергели, Бобур ва Бунёдкор кўчаларида транспорт воситаларининг юқори тезлигини 60 километргача чеклаш масаласи киритилганди.
Депутатлар масалани янада чуқур ва атрофлича ўрганиш, зарур бўлса, тезликни янада камайтириш мақсадида бу ишга тегишли мутахассисларни ҳам жалб этиш таклифини билдирганди. Шундан кейин доимий комиссия ва ИИББ ЙҲХБ томонидан Кичик ҳалқа автомобиль йўли ичида жойлашган барча кўчаларда транспорт воситаларининг ҳаракат тезлигини соатига 60 километргача чеклаш мақсадга мувофиқ деб топилди.
Шу билан бирга, баъзи кўчаларда ҳаракат хавфсизлигини тўлақонли таъминлаш, ўлим билан боғлиқ йўл-транспорт ҳолдисаларининг олдини олиш ва камайтириш, шунингдек, ҳаракат иштирокчилари учун етарли даражада қулай шароитлар яратиш мақсадида траспорт воситаларининг ҳаракат тезлигини соатига 50 километргача чеклаш мақсадга мувофиқ деб ҳисобланди. Булар жумласига Алишер Навоий, Махтумқули, Амир Темур, Кичик ҳалқа автомобиль йўли, Ислом Каримов, Тарас Шевченко, Бобур ва Фурқат кўчаларининг бир қисми ва Амир Темур хиёбони айланма йўли киради.
Доимий комиссияда мазкур масалани халқ депутатлари Тошкент шаҳар кенгашининг навбатдаги сессияси кун тартибига киритиш маъқулланди.
Изоҳ (0)