Донецкда маъмурий бино ўққа тутилди, Купянскда Украина байроғи акс этган граффитилар чизилмоқда. Урушнинг 235-кунидан фоторепортаж
Украина ва Россия кучлари параллел ҳужумларини давом эттирмоқда: Украина Қуролли кучлари Харьков ва Луганск вилоятлари чегарасида, «Вагнер» отрядлари эса Донецк вилоятидаги Бахмутда. 16 октябрь куни Белгород вилояти расмийлари ҳарбий полигонда аввалги куни содир бўлган оммавий қотиллик ҳақида хабар берди. Россия Мудофаа вазирлиги маълумотларига кўра, 11 киши ҳалок бўлган, 15 киши яраланган. Бироқ СОТА нашри воқеа гувоҳига таяниб, 22 киши ҳалок бўлгани ва 16 киши яралангани ҳақида хабар бермоқда. Урушни ўрганиш бўйича Америка институти Россия Украина ҳудудида этник тозалаш ишларини олиб бораётганини, босиб олинган ҳудудлардан украиналикларни олиб чиқиб, уларнинг ўрнига Россия фуқароларини кўчириб келаётганини даъво қилмоқда. Meduza урушнинг 235-кунига оид асосий фотосуратларни тақдим этди.
Донецкдаги маъмурият биноси ўққа тутилганидан кейинги вайронагарчилик
Донецкда россияпараст расмийлар шаҳар маъмурияти сифатида фойдаланадиган бино 16 октябрь куни эрталаб ўққа тутилди. «РИА Новости» ўзини ўзи республика деб эълон қилган Донецк халқ республикаси ваколатхонасига таяниб, хабар беришича ҳужум Украина қўшинлари томонидан амалга оширилган.Фото: Reuters
Ўт ўчирувчилар Донецкдаги маъмурият биносига ракета урилганидан кейин юзага келган ёнғинни ўчирмоқда. ДХР маълумотларига кўра, бинога HIMARS ёппасига ўт очувчи реактив тизимдан отилган Украина ракетаси тушган, портлаш бинонинг ойналарини синдириб юборган, учта машина ёниб кетган, икки фуқаро жароҳатланган. Украина Қуролли кучлари Бош штаби бу вазиятга изоҳ бермади.Фото: Anadolu
Шаҳар маъмурияти биносининг ракета ҳужумидан вайрон бўлган хоналаридан бири.Фото: «ТАСС»
Озод қилинган Купянскда Украина байроғи акс этган граффитилар чизилмоқда
Харьков вилоятининг Купянск шаҳрида украиналик рассом ўқ ва ракета парчаларининг излари қолган деворга сурат чизмоқда. Шаҳар февраль ойининг охирида рус қўшинлари томонидан босиб олинган эди. 10 сентябрь куни Купянск устида яна Украина байроғи кўтарилди.Фото: Reuters
Кўча рассомлари Купянскдаги уй деворига Украина байроғи рангларида граффити чизмоқда.Фото: EPA
Украиналик аскар ва кўча рассоми шаҳар номини украин тилида қайта ёзмоқда. Россия кучлари Купянскни босиб олган пайтда уни рус тилида ёзиб кетишган.Фото: EPA
Украиналик ҳарбийлар Россия танкидан аккумляторини олиб, заряд қилиш учун олиб кетмоқда.Фото: Reuters
Украина ҳарбийлари қўлга олинган рус танкини ўрмонда шохлар билан бекитмоқда.Фото: Reuters
Киевда оммавий ракета зарбаларидан кейин бир ҳафта ўтди
Тарас Шевченко университети қошидаги Максимович илмий кутубхонаси зали. 10 октябрь куни Россия қўшинлари Киев ва Украинанинг бошқа кўплаб шаҳарларига ҳужум қилди. Пойтахтдаги университет биноси ҳам ўққа тутилди. Илмий кутубхона зали айниқса қаттиқ зарба олди: у портлаш нуқтасига жуда яқин жойда — бинонинг бурчагида жойлашган.Фото: Anadolu
Болалар Тарас Шевченко паркига ракета тушганидан кейин ҳосил бўлган ўрада ўйнамоқда. 10 октябрь куни шаҳар марказдаги сув таъминоти тармоғи, 101 Tower biznes маркази биноси ва «Кличко кўприги» деб номланувчи пиёдалар ва велосипед кўприги шикастланган эди.Фото: Anadolu
Изоҳ (0)