2025 йилги Осиё ёшлар ўйинлари Ўзбекистонда ўтказилмайдиган бўлди. Бу ҳақда Осиё Олимпия кенгаши Х (собиқ Twitter) ижтимоий тармоғидаги саҳифасида маълум қилди.
“Осиё Олимпия кенгаши Ўзбекистон мезбонлигида Тошкентда ўтказилиши режалаштирилган Ёшлар ўртасидаги 3-Осиё ўйинлари 2025 йилда Баҳрайнда ўтказилишини маълум қилади. Бугун, 2 декабрь куни ўтказилган ташкилот ижрои қўмитаси йиғилишида бу ҳақдаги қарор қабул қилинди”, дейилади Осиё Олимпия кенгаши расмий ахборотида.
Ушбу мусобақа 9 спорт туридан 43 та мамлакатдан келган 14-17 ёшли спортчилар ўртасида ўтказилиши режалаштирилганди.
Маълум бўлишича, Ўзбекистон Миллий Олимпия қўмитаси ОCА’га хат йўллаб, 2025 йил сентябрь ойига режалаштирилган Осиё Ёшлар ўйинларига мезбонлик қила олмаслигини билдирган. Бунга Тошкентдаги Олимпия шаҳарчаси қурилиши ўз вақтида якунланмаслиги сабаб қилиб кўрсатилган.
Маълумот учун, президент Шавкат Мирзиёев жорий йилнинг 10 сентябрида ушбу ўйинлар ўтказилиши режалаштирилган Олимпия шаҳарчаси қурилиши билан танишганди.
Изоҳ (0)