Қашқадарё вилояти ҳокими Муроджон Азимов Хитой Халқ Республикасининг China CAMC Engineering Co.,LTD компанияси делегацияси билан видеоконференцалоқа форматида учрашув ўтказди. Бу ҳақда «Дарё»га вилоят ҳокимлиги ахборот хизмати раҳбари Аҳрор Содиқов маълум қилди.
Таъкидланишича, мулоқот бугун, 16 январь куни бўлиб ўтган.
Учрашувда Ўзбекистоннинг Хитой Халқ Республикасидаги элчиси Фарҳод Арзиев ҳам қатнашди. Унда вилоят ҳокимлиги ва Хитой компанияси ўртасида ўзаро ҳамкорлик бўйича икки томонлама битим имзоланди. Битимда томонлар вилоятнинг Китоб, Қамаши ва Шаҳрисабз туманларида замонавий осма дор йўлларини барпо этиш ва уларни биргаликда бошқаришни, вилоятда муқобил (қуёш, шамол ва бошқалар) ва энергия тежовчи технологияларни ишлаб чиқаришни, шунингдек, замонавий агрологистика марказларини қуриш ва томонлар учун манфаатли бўлган бошқа инвестицион лойиҳаларни амалга оширишни келишиб олишди, — дейди Аҳрор Содиқов.
Қўшимча қилинишича, лойиҳаларни тез фурсатда амалга ошириш ва доимий алоқа алмашиш мақсадида икки томонлама ишчи гуруҳ тузиш ва ишларни белгилаб олишга келишилган. Хитой компанияси бош директори Ли Хайсин Ўзбекистон бозори компаниянинг инвестициявий фаолиятида муҳим ўрин тутишини, 2022 йил 17 сентябрда Самарқандда ўтказилган ШҲТ давлат раҳбарлари кенгашининг 22-мажлиси тадбирлари доирасида давлат раҳбарларининг ўзаро учрашувларидан келиб чиқиб, компаниянинг Ўзбекистондаги фаолияти янада фаоллашганини айтган.
Жумладан, компания 2025 йилда Тошкентда Ёшлар ўртасидаги Осиё ва Параосиё ўйинлари ўтказиладиган Олимпия шаҳарчаси қурилишида бош лойиҳачи бўлди. Қисқа муддатда компания мутахассислари Ўзбекистонга келиб, осма дор йўллари қуриладиган ҳудудни ўрганишига келишиб олинди. Ўз навбатида, Қашқадарё вилояти ҳокими Муроджон Азимов ҳам Китоб туманида 500 гектар майдонда «Қайнар» замонавий туристик комплекси қурилаётганини, унда осма дор йўллари ва бошқа замонавий туристик объектлар қурилишини, қисқа муддатда осма дор йўлларини қуриш бўйича Хитой мутахассислари иштирокида ўрганиш миссияси ўтказилгандан кейин, иккинчи босқичда, февраль ойида осма дор йўлларини қуриш бўйича инвестиция шартномасини имзолаш лозимлигини айтди. Хитой компаниясининг тадбиркорлик фаолиятини ривожлантириш, унинг товар ва хизматларини оммалаштириш мақсадида Қарши шаҳрида компаниянинг лойиҳа бошқарув офисини ташкил қилиш, компаниянинг муқобил энергия манбаларини ишлаб чиқариш бўйича энг замонавий технологияларини жалб қилишни таклиф қилди, — дейди ҳокимлик масъули.
Изоҳ (0)