Шавкат Мирзиёев Тошкентда Олимпия шаҳарчаси қурилишига тамал тошини қўйди

Шавкат Мирзиёев 9 ноябрь куни Тошкент шаҳрида Олимпия шаҳарчаси қурилишига тамал тошини қўйди, деб хабар бермоқда Президент матбуот хизмати.

«Олимпия шаҳарчаси халқимизнинг юксак бунёдкорлик салоҳияти ва ўзбек спортининг оламшумул ютуқлари рамзига айланишига ишонаман. Бу маскан меъморий жиҳатдан мукаммал, энергия тежамкор ва энг илғор инновацион ечимларни мужассам қилган замонавий мажмуа бўлади», — деган Шавкат Мирзиёев.

Маросимда Осиё Олимпия кенгаши бош директори Ҳусайн ал-Мусаллам, Осиё Паралимпия қўмитаси президенти Мажид Рашид, CAMC Engineering компанияси бош директори Ли Хайсин, Ўзбекистон спорт ташкилотлари фахрийлари кенгаши раиси Баҳодир Махситов ва ёш спортчилар ҳам сўзга чиқиб, шаҳарчанинг бўлажак шароитлари ва аҳамияти ҳақида гапирган.

Ушбу лойиҳанинг қиймати 289 миллион доллардан зиёд. Шаҳарча майдони 100 гектар. Бу ерда 10 минг ўринли енгил атлетика ва футбол стадиони, 6 та ёпиқ ва 7 та очиқ спорт иншоотлари, сув спорти саройи, велотрек, яккакураш, жамоавий спорт мажмуалари барпо этилади.

Ушбу мажмуада Ёшлар ўртасидаги Осиё ва Параосиё ўйинлари ўтказилиши кутилмоқда. Бу мусобақалар 2025 йилда ўтказилади. Унда 45 мамлакат ёшлари 20 га яқин спорт тури бўйича беллашади.

Мажмуа мусобақалардан сўнг бўшаб қолмайди. Кейинчалик бу ерда Спортни ривожлантириш вазирлиги, спорт федерациялари ва Ўзбекистон давлат спорт академияси фаолият кўрсата бошлайди. Мажмуаларда фуқаролар ҳам спорт билан шуғулланиши мумкин бўлади.

Тадбирда таниқли спортчилар, федерациялар раҳбарлари, соҳа фахрийлари, давлат ва жамоат ташкилотлари вакиллари жам бўлди.