2024 йилнинг 1-8 декабрь кунлари Малайзиянинг Куала-Лумпур шаҳрида кар ва заиф эшитувчилар ўртасида 10-Осиё ва Тинч океани ўйинлари ўтказилади. Ушбу нуфузли мусобақада сурдлимпия спорт турлари бўйича (эшитишда нуқсони бор спортчилар) Ўзбекистон миллий терма жамоаси ҳам иштирок этади.
Футбол бўйича кар ва заиф эшитувчилар Ўзбекистон миллий терма жамоаси
Ижтимоий ҳимоя миллий агентлиги ҳузуридаги Ижтимоий инспекция матбуот хизмати бўлим бошлиғи Ойбек Болтабоевнинг “Дарё”га маълум қилишича, тўққизта йўналиш бўйича ўтказилиш режалаштирилган мусобақаларда қирқ нафар ўзбекистонлик спортчилар таэквандо, юнон-рум ва эркин кураш, дзюдо йўналишлари бўйича мамлакатимиз шарафини ҳимоя қиладилар. Шунингдек, футбол терма жамоаси ҳам иштирок этади.
“Айни пайтда мусобақаларга қизғин тайёргарлик кўрилмоқда. Спортчилар билан республикамизнинг кучли мураббийлари машғулотлар олиб бормоқда. Жараёнларни Спорт вазирлиги, Ижтимоий инспекция, Паралимпия қўмитаси ҳамда Ўзбекистон карлар спорт федерацияси томонидан назорат қилиб бориши билан бирга, етарлича шароит ва имкониятлар яратилмоқда. Ўйлаймизки, спортчиларимиз юқори натижаларга эришиб, юртимизга қайтишади”, дейди Ўзбекистон Карлар спорт федерацияси вице-президенти Ҳусниддин Қутпиддинов.
Дилбар Каримованинг қўшимча қилишича, ушбу ўйинларда ўзбекистонлик спортчилар шу кунга қадар битта кумуш ва бешта бронза медалини қўлга киритган.
Маълумот учун, Осиё ва Тинч океани ўйинлари биринчи марта 1984 йилда Осиё ва Тинч океани футбол чемпионати сифатида Тайваннинг Тайпей шаҳрида ўтказилган ва 1992 йилга қадар карлар футболи бўйича Осиё ва Тинч океани чемпионати дея номланган.
Аввалроқ президентнинг “Ногиронлиги бўлган шахсларни спортга жалб этиш орқали жисмоний реабилитация қилиш тизимини такомиллаштириш бўйича қўшимча чора-тадбирлар тўғрисида”ги қарори қабул қилинганди.
Изоҳ (0)