Доғистонда Махачқалъа чеккасида жойлашган Новий Хушет қишлоғида жойлашган ёқилғи қуйиш шохобчасида портлаш содир бўлди. Ҳодиса оқибатида 13 киши ҳалок бўлди, 23 киши жароҳат олди.
Аввалроқ Россия соғлиқни сақлаш вазирининг ёрдамчиси Алексей Кузнецов саккиз нафар жабрланувчи касалхонага ётқизилгани, улардан бирининг аҳволи оғир эканини маълум қилганди.
Қайд этилишича, ёнғин 500 квадрат метр майдонни қамраб олган. Shot Telegram каналига кўра, портлаш эпитцентрига яқин жойда жойлашган ёқилғи қуйиш шохобчаси ошхонасидан 14 киши қутқариб олинган.
Воқеа юзасидан “хавфсизлик талабларига жавоб бермаганлик ҳамда икки ёки ундан ортиқ кишининг ўлимига сабаб бўлган хизматлар кўрсатиш” моддаси бўйича жиноят иши қўзғатилган. Бундай жиноят учун максимал етти йил қамоқ жазоси белгиланиши мумкин. Shot нашрининг ёзишича, портлаш бензин ёниши натижасида содир бўлган. Бошқа манбаларда бу маълумот тасдиқланмаган.
“Доғистонда 28 сентябрь портлаш қурбонлари хотирасига мотам куни деб эълон қилинди”, деб хабар берди республика раҳбари матбуот хизмати.
Изоҳ (0)