“Исириқ тутатиб, шам ёқиб жон сақладик, болалар ва кексалар кўп қийналди”. Бойсундан репортаж

Хабарингиз бор, 2024 йилнинг 1 сентябрь куни Сурхондарё вилоятининг Бойсун туманидаги “Мустақилликнинг 25 йиллиги” конига қарашли қудуқларнинг бирида техноген вазият содир бўлган ва оқибатда Кофрун қишлоғида яшовчи аҳоли вакиллари эвакуация қилинган эди. Мазкур ҳолат икки ой давом этган бўлса, аҳоли вакиллари бу муддат давомида туман марказидаги қариндошлариникида ва коллеж биноларида ҳаёт кечирди. “Дарё” ижодий жамоаси мазкур қишлоқда бўлиб, аҳолининг ўтган фурсат давомида қандай яшагани, газдан сақланиш учун нималарга эътибор беришгани ҳақида суҳбатлашди. 

Ўзига яраша қийинчилик бўлди. Бундай пайтда одам ўзини ўзи ҳимоя қилиши керак экан. Уйда мол-ҳолим борлиги сабаб газ чиққан вақтда ҳам қишлоғимизда, уйимизда қолишга мажбур бўлдим, дейди газ сизиб чиққан конга яқин бўлган Кофрун қишлоғида яшовчи Саиджон ака Холов. 

Саиджон Холов газ сизиб чиққан пайтда уйида исириқ тутатиб, шам ёқиб ўтирганини, шу усул орқали газ ҳидидан сақланганини айтмоқда. 

Эски тоғорага исириқ тутатиб, айвонга қўйдик. Ичкарида эса шам ёқиб жон сақладик. Бу газ ҳидини кесарди, дейди у. 

“Дарё” журналистлари 2024 йилнинг 6 декабрь куни айнан ўша конда бўлиб, газ чиқаётган туйнук ёпилганига ва ҳудудда тозалаш ишлари амалга оширилаётганига гувоҳ бўлди. Журналистлар, шунингдек, шу куни ёпилган туйнукдан тахминан 100-150 метр узоқликда яна газ чиқаётганига, туйнукка сув тўкилиб, чиқаётган газ булоқ каби қайнаб турганини ҳам кузатган. 

Журналистларнинг тасвирга олишига халал берган завод ишчилари сёмка учун “тепа”дан рухсат олиш кераклигини айтиб, тез орада мазкур конда ОАВ вакиллари учун матбуот анжумани ташкил этилишини, газ чиқаётган қудуқ ёпилганини расман эълон қилиш режалаштирилаётганини очиқлаган.

Кофрунликлар конга қарашли қудуқдан сизиб чиққан газ одамларда кўнгил айниши, бош оғриғи ва нафас олишнинг қийинлашишига олиб келгани ҳақида гапириб берди. 

Ҳид бошга оғриқ берарди, кўнгил айниши бўларди. Нафас олиш қийинлашиб, томоқдан қисарди, дея ҳолатни эслайди Саиджон ака. 

Таъкидланишича, Бойсун фожиаси рўй берган пайтда завод аҳоли вакиллари учун озиқ-овқат маҳсулотлари улашиб турган. Шунингдек, қишлоққа алоҳида тез ёрдам машинаси олиб келиниб, одамларга ўз вақтида тез тиббий ёрдам кўрсатилган. 

Шифохоналарда беморлар кўпайиб, жойлар етмай қолди, дейди суҳбатдошлар. 

Шу қишлоқда яшовчи Мавлуда Мўминованинг айтишича, воқеа сабаб қишлоқдаги мактаблар ҳам ёпилган. 

Уйга кириб, вентилятор қўйиб ўтирардик. Шамол ҳидни ҳайдарди. Уч нафар фарзандим ва эрим билан шу тарзда яшадик. Қишлоқдаги мактаблар ҳам ёпилиб қолди, дейди Мавлуда опа. 

Яна бир суҳбатдош Фарҳод Мамадиев масъуллар газни жиловлаганидан хурсандлигини, ҳид чиқмаса, қишлоқ аҳли яшашда давом этишини айтмоқда. 

Портлаш овози ваҳимали эди. Газ портлаганини кейин билдик. Ўша пайтда қишлоқ одамларини туман марказидаги коллежларга олиб бориш учун 2 та автобус қўйилди. Молимизга қараш учун баъзан келиб турардик, дейди Фарҳод ака. 

Суҳбатдошларга кўра, қишлоқ аҳолиси туман марказидаги 4 та коллеж биноларидан қўним топган. 

Кечаси коллежга бориб, кундузи молга қараш учун уйга келиб турдик. Баъзан ҳид кучли чиққан пайтда келолмай қолган пайтимиз ҳам бўлди. Автобусдан тушсак, газ ҳидига чидаб бўлмасди. Уйга келиб ўчоқ ёқардик ва шунинг тутунидан нафас олардик, дейди Марям Жўраева.