Туркиянинг Сакаря вилоятида жойлашган фабрикада портлаш содир бўлди. Бош консулхона ахборот хизмати жароҳатланганлар орасида ўзбекистонликлар йўқлигини маълум қилди.
Келтирилишича, 15 сентябрь куни Сакарянинг Ҳендек туманида жойлашган Оба макарон фабрикасида техноген авария натижасида портлаш содир бўлиб, ёнғин юзага келган. Дастлабки маълумотларга кўра, портлаш ем силослари жойлашган ҳудудда бошланган. Фабрикада ишлаган 27 нафар ишчи жароҳатланиб, улардан 6 нафарининг аҳволи оғир.
Воқеа юзасидан Ҳендек туман прокуратураси томонидан суриштирув бошланган. Мазкур фожиада жабрланганлар орасида Ўзбекистон фуқаролари аниқланмаган.
Бундан аввал Ўзбекистонлик 21 ёшли аёл аммаси таклифига кўра Истанбулга бориб, кўчада қолиб кетгани маълум бўлганди. “Халқаро ўзбек саноатчилари, тадбиркорлар ва илм инсонлари жамияти” аъзолари ҳомийлигида авиачипта ва бошқа тўловлари қопланди. Ёрдам берган барчага аёл ва консулхона номидан ташаккур билдирилди.
Шунингдек, Туркиянинг Истанбул шаҳрида ўз қизи томонидан қийин аҳволда қолдирилган аёл ва унинг ўғли Ўзбекистонга қайтарилгани хабар қилинганди.
Изоҳ (0)