Испанияда кичик самолёт электр узатиш линияси билан тўқнашиб, ҳалокатга учраши оқибатида икки киши ҳалок бўлди. Бу ҳақда El Caso нашри хабар бермоқда.
Маълум қилишича, фожиа 6 июль куни Сан-Хосе-дел-Валле муниципалитетида содир бўлган. Юқори кучланишли электр сими билан тўқнашгандан сўнг, ҳаво кемаси бориш қийин бўлган жойга қулаб тушган.
Воқеа жойига бир нечта тез ёрдам машиналари, шунингдек, фавқулодда вазиятлар хизмати ва ҳуқуқ-тартибот идоралари ходимлари етиб келган. Самолётга биринчи бўлиб Испания фуқаро гвардиясининг навбатчи зобити етиб борган ва у ерда 70 ва 73 ёшли икки кишининг жасадини топган.
“Дастлабки маълумотларга кўра, La Ina аэродромида жойлашган ва ўша куни эрталаб одатдаги парвозни амалга оширган кичик самолёт ҳалокатга учраган. Терговчилар авариянинг аниқ ҳолатларини ва юқори кучланишли электр сими билан тўқнашув сабабларини аниқлаш учун тергов жараёнини бошлаганлар”, дейилади мақолада.
Таъкидланишича, Сан-Хосе-дел-Валле муниципалитетида фавқулодда вазият туфайли электр таъминоти узилган. Бир қатор аҳоли бир неча соат давомида электр энергиясиз қолган.
22 июнь куни Қозоғистоннинг Остона шаҳрида енгил моторли ТЛ-2000 самолёти қулаб тушди. Ҳодиса оқибатида икки киши ҳалок бўлди. 12 июнь куни Ҳиндистоннинг Аҳмадобод шаҳри аэропорти яқинида Air India авиакомпаниясининг Boeing 787-8 Dreamliner самолёти ҳалокатга учраши оқибатида унинг бортидаги барча 242 киши ҳалок бўлди.
Изоҳ (0)