Германия канцлери Ангела Меркель, Франция президенти Франсуа Олланд ва Испания бош вазири Мариано Рахой Франциянинг Альп тоғларидаги ҳалокат жойига етиб келди, дея хабар бермоқда «Российская газета».
Меркель Франция томонига мурожаат қилар экан, уларга чуқур миннатдорлик билдирди. У ерда канцлер қутқарувчилар билан суҳбатлашиб, қурбонлар жасадларини қидириш имкониятлари ҳақида маълумот олмоқчи. Германиялик анатом-патологлар ҳисоблашича, қурбонлар шахсларини аниқлаш икки ҳафта давом этиши мумкин.
Сўнгги маълумотларга кўра, ҳалокат қурбонлари орасида 72 нафар Германия фуқаролари, 45 испаниялик, уч нафардан Британия ва Қозоғистон фуқаролари, икки нафардан Япония, Колумбия, Австралия фуқаролари, шунингдек Нидерландия, Дания, Туркия, Исроил ва Мексика фуқаролари бор.
Эслатиб ўтамиз, 24 март куни Барселонадан Дюссельдорфга парвоз қилаётган Airbus А320 самолёти Франция жанубида, Альп тоғлари устида ҳалокатга учраши оқибатида лайнер бортида бўлган 150 кишининг барчаси ҳалок бўлган эди.
Изоҳ (0)