Исроил бош вазири Биньямин Нетаньяху 7 июль куни АҚШ президенти Дональд Трампни тинчлик бўйича Нобель мукофотига номзод қилиб кўрсатганини айтди. Бу ҳақда The Hill хабар берди.
Нетаньяху ҳозирда расмий ташриф билан Вашингтонда бўлиб турибди. У АҚШ президенти билан кечки овқат пайтида уни Нобель учун номзод қилиб кўрсатганини айтган. Бу Трампнинг Эрон ядро объектларига зарба бериш ҳақидаги буйруғидан кейинги илк юзма-юз учрашув ҳисобланади.
Президент аллақачон улкан имкониятни рўёбга чиқарди. У Иброҳимий битимларни тузди. У ҳозирда бир мамлакат ва бир минтақадан кейин бошқасида тинчлик ўрнатмоқда. Шу боис, жаноб президент, мен сизга Нобель мукофоти қўмитасига юборган мактубимни тақдим этмоқчиман. Унда сизни муносиб равишда тинчлик мукофотига номзод қилиб кўрсатганман. Сиз бунга лойиқсиз ва уни олишингиз керак, деган Нетаньяху.
АҚШ президенти миннатдорлик билдириб, мазкур янгиликдан бехабар бўлганини маълум қилган.
Катта раҳмат! Мен бундан бехабар эдим. Буни айнан сиздан эшитиш менга алоҳида қадрли. Жуда миннатдорман, Биби! Бу мен учун катта шараф, дея жавоб қайтарган Трамп.
Республикачи конгрессмен Бадди Картер (Жоржия штатидан) ҳам Нобель қўмитасига Дональд Трамп номзодини илгари суриб мактуб йўллаган эди. У Исроил ва Эрон ўртасида можаро тўхташига президент ёрдам берганини сабаб қилиб кўрсатган.
Бундан ташқари, Покистон ҳукумати ҳам АҚШ президентини Ҳиндистон билан низони ҳал этишдаги воситачилиги учун Нобель мукофотига номзод сифатида илгари сурган. Айнан Америка раҳбарининг ҳаракатлари вазиятнинг кескинлашувини тўхтатишга ёрдам бергани ва ҳал қилувчи рол ўйнагани таъкидланган. Дональд Трампнинг ўзи аввалроқ тинчлик бўйича Нобель мукофотига лойиқ эканини, бироқ уни ҳеч қачон ололмаслигини айтган эди.
Изоҳ (0)