Isroil bosh vaziri Binyamin Netanyaxu 7-iyul kuni AQSH prezidenti Donald Trampni tinchlik bo‘yicha Nobel mukofotiga nomzod qilib ko‘rsatganini aytdi. Bu haqda The Hill xabar berdi.
Netanyaxu hozirda rasmiy tashrif bilan Vashingtonda bo‘lib turibdi. U AQSH prezidenti bilan kechki ovqat paytida uni Nobel uchun nomzod qilib ko‘rsatganini aytgan. Bu Trampning Eron yadro obyektlariga zarba berish haqidagi buyrug‘idan keyingi ilk yuzma-yuz uchrashuv hisoblanadi.
Prezident allaqachon ulkan imkoniyatni ro‘yobga chiqardi. U Ibrohimiy bitimlarni tuzdi. U hozirda bir mamlakat va bir mintaqadan keyin boshqasida tinchlik o‘rnatmoqda. Shu bois, janob prezident, men sizga Nobel mukofoti qo‘mitasiga yuborgan maktubimni taqdim etmoqchiman. Unda sizni munosib ravishda tinchlik mukofotiga nomzod qilib ko‘rsatganman. Siz bunga loyiqsiz va uni olishingiz kerak, degan Netanyaxu.
AQSH prezidenti minnatdorlik bildirib, mazkur yangilikdan bexabar bo‘lganini ma’lum qilgan.
Katta rahmat! Men bundan bexabar edim. Buni aynan sizdan eshitish menga alohida qadrli. Juda minnatdorman, Bibi! Bu men uchun katta sharaf, deya javob qaytargan Tramp.
Respublikachi kongressmen Baddi Karter (Jorjiya shtatidan) ham Nobel qo‘mitasiga Donald Tramp nomzodini ilgari surib maktub yo‘llagan edi. U Isroil va Eron o‘rtasida mojaro to‘xtashiga prezident yordam berganini sabab qilib ko‘rsatgan.
Bundan tashqari, Pokiston hukumati ham AQSH prezidentini Hindiston bilan nizoni hal etishdagi vositachiligi uchun Nobel mukofotiga nomzod sifatida ilgari surgan. Aynan Amerika rahbarining harakatlari vaziyatning keskinlashuvini to‘xtatishga yordam bergani va hal qiluvchi rol o‘ynagani ta’kidlangan. Donald Trampning o‘zi avvalroq tinchlik bo‘yicha Nobel mukofotiga loyiq ekanini, biroq uni hech qachon ololmasligini aytgan edi.
Izoh (0)