АҚШнинг “Интер Майами” клуби аргентиналик ҳужумчи Лионель Месси билан амалдаги шартномани узайтиришни режалаштирмоқда. Бу ҳақда таниқли инсайдер Фабрицио Романо хабар берди.
Манбага кўра, ҳар икки томон — ҳам футболчи, ҳам клуб ҳамкорликни давом эттиришдан манфаатдор:
“Лионель Мессининг шартномаси 2025 йил охиригача амал қилади. Ҳозирда томонларнинг ҳар иккиси ҳам ҳамкорликни давом эттиришдан манфаатдор”, — дейди Романо.
Аввалроқ ҳужумчи Саудия Арабистони клубларининг бири билан музокара олиб бораётгани борасида хабарлар тарқалган эди.
Маълумот учун, 38 ёшли Месси “Интер Майами” сафига 2023 йилда қўшилган. У жорий мавсумда клуб сафида 24 та ўйинда майдонга тушиб, 16 та гол ва 6 та голли узатмага муаллифлик қилган. Transfermarkt портали унинг қийматини 18 миллион еврога баҳоламоқда.
Эслатиб ўтамиз, Месси профессионал фаолиятининг катта қисмини “Барселона”да ўтказган. У Каталония клуби сафида 17 йилдан ортиқ тўп сурган бўлиб, 2021 йилда Парижнинг “ПСЖ” клубига ўтган эди. У ердаги икки йиллик фаолиятидан кейин “Интер Майами” билан шартнома имзолаган.
Изоҳ (0)