Apple компанияси тасодифан Хитойнинг Weibo ижтимоий тармоғидаги расмий саҳифасида Samsung’нинг янги букилувчан смартфонига оид реклама ролигини жойлаштирди. Бу ҳақда Apple’га оид янгиликлар, таҳлиллар ва миш-мишларни ёритишга ихтисослашган 9to5Mac нашри хабар берди.
Компания вакилининг сўзларига кўра, пост ижтимоий тармоқ контентини бошқарувчи ходимлар томонидан юзага келган хатолик натижасида пайдо бўлган:
“AppleSupport фақат Apple билан боғлиқ контентни эълон қилади. Бу қандай юз берганини аниқлаш учун биз Weibo билан бирга ишламоқдамиз”, дейилади манбада.
Адашиб жойлаштирилган Samsung ҳақидаги видео изоҳида Apple қурилмаларидаги ота-она назорати функциясига бағишланган матн бор эди:
“Қурилмангизда ота-она назоратини созлаб, фарзандингизнинг App Store орқали юклаб олиш ва харид қилиш сўровларини бошқаришингиз мумкин”, дейилганди постда.
Apple Support саҳифасидаги ушбу пост ўчириб ташланишидан олдин ижтимоий тармоқ фойдаланувчилари орасида яшиндек тарқалди. Обуначилар эса ҳазиллашиб, яқинда ишга олинган амалиётчи туфайли Apple хато қилди, деган изоҳларни қолдирди.
Изоҳ (0)