Ижтимоий тармоқларда Янгийўл туманида эркак аёлни аёвсиз калтаклагани айтилган видеолар тарқалиб, турли муҳокамаларга сабаб бўлмоқда. Тошкент вилояти ИИББ ҳолат юзасидан маълумот берди.
Унда айтилишича, мазкур ҳолат юзасидан туман ИИБ ходимлари томонидан олиб борилган дастлабки суриштирувга кўра, воқеа бугун, 31 июль куни тонгги соат 05:00 ларда содир бўлган.
Янгийўл туманида яшовчи 27 ва 20 ёшли эр-хотин уйда ўзаро жанжаллашиб, натижада аёл турмуш ўртоғи бошқарувидаги автомашина шинасини уйдан олган ошхона пичоғи билан тешган.
Шундан сўнг эр пичоқни олиб қўйишга уринганида, аёл пичоқни бермагани ва ўтган вақт давомида улар мазкур ҳолат бўйича ички ишлар органларига мурожаат қилмагани аниқланган.
Айни вақтда ҳолат юзасидан терговга қадар текширув ишлари олиб борилмоқда. Қайд этилишича, қонун доирасида тегишли чоралар кўрилиши таъминланади.
Ижтимоий ҳимоя миллий агентлиги 2025 йилнинг биринчи ярмида аёлларни тазйиқ ва зўравонликдан ҳимоя қилиш бўйича кўрилган чоралар ҳақида маълумот берди.
Унга кўра, 2025 йилнинг январь–июнь ойларида тазйиқ ва зўравонликдан жабрланган 41 051 нафар хотин-қизга ҳимоя ордери расмийлаштирилди. “Инсон” ижтимоий хизматлар марказлари томонидан тазйиқ ва зўравонликка учраган 11 914 нафар аёлга кундузги ижтимоий хизматлар кўрсатилди.
Изоҳ (0)