Шимолий Корея Украинага қарши Россия учун жанг қилаётган қўшинлари сонини уч баробарга оширади. Хусусан Москвага ёрдам бериш учун қўшимча 25-30 минг аскар юборади. Бу ҳақда Украина разведка ҳисоботида маълум қилинди.
Ғарб разведкаси ҳам бу прогнозни тасдиқлаб, Шимолий Корея 30 минг нафар ҳарбийни Россияга юборишини маълум қилган.
Украина разведка маълумотига кўра, Россия Мудофаа вазирлиги “рус жанговар бўлинмаларига янада интеграциялашиш мақсадида корейс ҳарбийларини керакли техника, қурол ва ўқ-дорилар” билан таъминлашга қодир. “Шимолий Корея ҳарбийлари Россия томонидан босиб олинган Украинанинг баъзи қисмларида рус контингентини кучайтириш учун” жангга жалб қилинади. Шунингдек, Россия ҳарбий самолётлари Пхеньян аскарларини ташиш учун қайта жиҳозланаётгани ҳақида тахминлар бор.
CNN томонидан олинган сунъий йўлдош тасвирларида аскарларни ташишга тайёргарлик кўрилаётгани акс этган. Жумладан, Россия портида кема, Шимолий Кореянинг Сунан аэропортида эса юк самолётлари пайдо бўлган.
“Россиянинг Шимолий Корея элита қўшинларидан фойдаланиши тоталитар режимга тобора кўпроқ таянаётганини билдиради. Шунингдек, бу русларнинг сафарбарлик захираси билан боғлиқ жиддий муаммоларни ҳам акс эттиради. Ҳамкорларимиз билан биргаликда ушбу таҳдидларни кузатиб борамиз ва шунга мувофиқ жавоб берамиз”, деди Украина мудофаа вазири Рустем Умеров.
Жанубий Корея Миллий разведка хизмати Пхеньян июль ёки август ойларидаёқ юборилиши кўзда тутилган ҳарбийларни танлашни бошлаганини маълум қилган. Унга кўра, Россияга яна 6000 нафар шимолий кореялик ҳудудларни миналардан тозаловчилар ва ҳарбий қурувчилар юборилиши режалаштирилмоқда.
Россия оммавий ахборот воситаларидаги хабарлар ҳам икки давлат ўртасидаги ҳамкорлик фаоллашганига ишора қилмоқда. Улар томонидан жойлаштирилган видеода Шимолий Корея бўлинмасининг интенсив тайёргарлиги акс этган. “ТАСС” томонидан эълон қилинган яна бир видеода корейс аскарларининг Россия армиясидаги фаолиятини кўриш мумкин.
Россияга 2024 йил ноябрь ойида Украинани Курск вилоятидан чиқариб юбориш учун 11 минг корейс ҳарбийлари юборилган эди. Маълумотларга кўра, Пхеньяннинг 4 мингга яқин аскари рус-украин урушида ҳалок бўлган ёки яраланган. Шунга қарамай, бу Пхеньяннинг Москва билан алоқаларига салбий таъсир этмаган.
Изоҳ (0)