Шимолий Корея АҚШни Пхеньян Россияга қурол сотаётгани ҳақида “миш-миш тарқатиш” оқибатларидан огоҳлантирди

Агар АҚШ Россия ва Шимолий Корея ўртасидаги қурол савдоси ҳақида “миш-миш тарқатишда” давом этса, бунинг ёқимсиз оқибатларига дуч келиши мумкин. Бу ҳақда КХДР ташқи ишлар вазири Квон Жонг Гин баёнотига таяниб, Корея Марказий телеграф ахборот агентлиги хабар берди.

“Бу сафар АҚШ яна бир бор асоссиз қурол савдоси масаласини кўтарди ва ўзининг Украинага қурол сотишини аҳмоқона тарзда оқлашга уринди. Қўшма Штатлар шуни ёдда тутиши керакки, агар бизнинг мамлакатимизга қарши бемаъни гапларни тарқатишда давом этса, улар чинакам ёқимсиз оқибатларга дуч келади”, — деди ТИВ раҳбари.

Шунингдек, у Пхеньянда бундай ҳаракатлар КХДРнинг жаҳондаги обрўсига путур етказишга қаратилган провокация сифатида баҳоланаётганини айтди.

Квон Жонг Гиннинг қўшимча қилишича, агар АҚШ “Россиянинг қонуний хавфсизлик манфаатларига путур етказган ҳолда” НАТО кучларини шарққа кўчирмаганида, Украинада уруш рўй бермаган бўларди.

Январь ойида Оқ уй Миллий хавфсизлик кенгашининг стратегик коммуникациялар бўйича координатори Жон Кирби АҚШ БМТнинг Санкция қўмитасига Шимолий Кореядан Россияга қурол етказиб берилиши кўрсатилган ҳисобот тақдим этганини маълум қилганди. Кирби Шимолий Кореядан қурол экспорт қилиш БМТ Хавфсизлик кенгаши резолюцияларини тўғридан тўғри бузиш эканини таъкидлади.

Декабрь ойи охирида Кирби “Вагнер” хусусий ҳарбий компанияси Шимолий Корея қуролларидан фойдаланаётганини айтганди. Компания асосчиси Евгений Пригожин эса Кирби “спекуляцияларга асосланган баёнотлар” бераётганини даъво қилган.