Даниялик эркак Эрон разведкаси учун Берлиндаги яҳудийлар ташриф буюрадиган объектлар ва одамлар ҳақида маълумот тўплаганликда айбланиб, ҳибсга олинди. Бу ҳақда Fox News хабар берди.
Айбланувчи Германиядан Данияга экстрадиция қилинишини кутилмоқда. Унинг исми махфийликни сақлаш мақсадида Али С дея юритилмоқда. У 26 июнь куни Даниянинг Орхус шаҳрида қўлга олинган.
Гумонланувчи биноларни, жумладан, Германия—Исроил жамияти штаб-квартирасини ва яҳудийлар марказий кенгаши президенти Ёзеф Шустер баъзан тўхтаб ўтадиган бинони суратга олган.
“У 2025 йил бошида Эрон разведка хизмати томонидан Берлиндаги яҳудий аҳоли пунктлари ва муайян яҳудий шахслар ҳақида маълумот тўплаш учун юборилган”, деди прокурорлар.
Гумонланувчи июнь ойида 3 та жойда жосуслик қилганликда айбланмоқда. Тахминларга кўра, у кейинги разведка фаолиятига, жумладан, “терактларга тайёргарлик кўрган”. Эроннинг Германиядаги элчиси Мажид Нили Аҳмадабодий 1 июль куни Германия Ташқи ишлар вазирлигига чақиртирилган. У бу даъволарни “асоссиз ва хавфли айбловлар” дея баҳолаган.
“Агар ушбу шубҳа тасдиқланса, бу Эрон бутун дунё яҳудийлари учун таҳдид эканини яна бир бор намойиш этадиган даҳшатли ҳодиса бўларди”, деди Германия ташқи ишлар вазири Иоганн Вадефул.
Германия хавфсизлик идоралари Исроил ва Эрон ўртасидаги 12 кунлик урушга жавобан мамлакатдаги яҳудий объектларни ҳимоя қилишни кучайтирган.
Изоҳ (0)