Apple компанияси 98 та мамлакатдаги iPhone фойдаланувчиларига жосуслик дастурлари ҳужуми қурбони бўлишлари мумкинлиги ҳақида огоҳлантиришлар юборди. Бу ҳақда TechCrunch хабар берди.
10 июль куни юборилган огоҳлантиришда гап қандай зарарли дастур ҳақида кетаётганига аниқлик киритилмаган. Фойдаланувчилари Apple’дан билдиришнома олган мамлакатлар рўйхати ҳам тақдим этилмаган.
“Apple сизнинг Apple ID билан боғлиқ бўлган iPhone’ни масофадан бузишга уринаётган жосусларга қарши дастур ҳужуми қурбони эканлигингизни аниқлади. Бу ҳужум, эҳтимол, кимлигингиз ва нима билан шуғулланаётганингиз туфайли сизга қаратилган бўлиши мумкин. Apple бу огоҳлантиришга ишонади — илтимос, буни жиддий қабул қилинг”, дейилади компания огоҳлантиришида.
2024 йил апрелида ҳам Apple шунга ўхшаш билдиришнома тақдим этган эди. Шундан кейин 92 та мамлакатдаги фойдаланувчилар компаниядан огоҳлантириш олган. Reuters ва TechCrunch таъкидлашича, илгари бундай огоҳлантиришларда Apple давлат томонидан ҳомийлик қилинган хакерлик ҳужумларини назарда тутган.
Эндиликда компания веб-сайтида оммавий тадқиқот ва журналистик ҳисоботларга таяниб, муайян шахсларга нисбатан бундай мураккаб ва қимматга тушадиган ҳужумлар анъанавий равишда улар учун NSО Group компаниясининг Pegasus каби тижорий жосуслик дастурларини ишлаб чиқувчи ҳукумат вакиллари ёки хусусий компаниялар томонидан амалга оширилгани ҳақида хабар берилган.
Изоҳ (0)