Руминияда Россия фойдасига жосуслик қилишда гумонланган шахс ҳибсга олинди

Руминияда Россия фойдасига жосуслик қилишда айбланган шахс ҳибсга олинди. Бу ҳақда The Moscow Times нашри хабар берди.

Руминия прокуратураси жума куни Москва фойдасига жосусликда гумон қилинган шахсни ҳибсга олишга буйруқ чиқарган. Ушбу шахс билан алоқалари фош қилинган Россия дипломати Руминияда персона нон грата деб эълон қилинган.

Прокурорларнинг таъкидлашича, ҳибсга олинган Руминия фуқароси 2022 йилдан бери Украина билан чегарага яқин Тулча муниципалитети яқинида жойлашган Руминия ёки НАТО ҳарбий объектларини кузатиб келган. Улар ҳақида батафсил маълумот тўплашга ҳаракат қилган.

У Россиянинг Бухарестдаги элчихонаси дипломатларига маълумот узатиб турган. Ҳибсга олинган шахс ҳарбий маълумот тўплаш ва ҳарбий жанговар техника ҳамда шахсий таркибнинг Украина билан чегарадош ҳудуддаги ҳаракатини суратга олишда айбланмоқда.

Расмийлар ҳибсга олинган эркакнинг ёши ва шахсини ошкор қилмаган. Тергов давом этаётганлиги билдирилган.

Кейинроқ Руминия Ташқи ишлар вазирлиги Россия элчихонаси дипломатини дипломатик алоқалар тўғрисидаги Вена конвенциясини бузишда айблаб, Руминия ҳудудида персона нон грата деб эълон қилган.

Руминия Ташқи ишлар вазирлиги Россия муваққат ишлар вакилини қарор ҳақида хабардор қилиш учун идорасига чақирганини билдирган.