Adbent Health клиникасининг Глобал робототехника институти директори, шифокор Випул Пател дунёда илк бор минглаб километр узоқликда жойлашган беморга масофадан туриб, робот ёрдамида жарроҳлик амалиёти ўтказди. Бу ҳақда The Independent нашри хабар берди.
67 ёшли Фернанду да Сильва анголалик бўлиб, унга простата бези саратони ташхиси қўйилган эди. У трансконтинентал роботлаштирилган тележарроҳлик технологияси клиник синовларида қатнашган илк бемор бўлди.
“Биз буни устида икки йил давомида ишладик. Бутун дунёни кезиб, технологияларни ўргандик ва энг мосини танладик”, дейди шифокор.
Аввал ҳам операцияларда роботлар қўлланилган, бироқ уларни бошқарган шифокорлар бемордан унчалик узоқ бўлмаган жойда бўлган.
Операция муваффақиятли ўтган. Жараён давомида ҳар эҳтимолга қарши бемор жойлашган операцион хонада жарроҳлик жамоаси ҳам навбатчилик қилган. Пател эса бу жараённи тиббиёт соҳасида катта бурилиш дея таърифлади.
Доктор Пател бу технологиянинг келажакдаги имкониятларига катта умид боғламоқда.
“Ҳатто АҚШнинг чекка қишлоқларида ҳам бу технология фойдали бўлиши мумкин. Келажакда тез ёрдам машиналарида ёки фавқулодда ҳолатларда беморларга масофадан туриб тезкор ёрдам кўрсатиш имконияти пайдо бўлади”, дейди у.
Бундан олдин Хитойда роботлар иштирокида илк футбол турнири бўлиб ўтган эди.
Изоҳ (0)