Хитойдаги вазият
Хитой Соғлиқни сақлаш миллий комиссиясининг маълум қилишича, мамлакат бўйлаб вирусни юқтириб олганлар сони 78 824 кишини ташкил қилиб, 32 495 киши даволанишга муваффақ бўлди. Коронавирус билан касалланиш оқибатида вафот этганлар сони 2858 кишига етди.
Жаҳон соғлиқни сақлаш ташкилоти 27 февраль ҳолатига кўра, жаҳоннинг 48 мамлакатида коронавирус инфекцияси аниқланиб, умумий ҳисобда 82 249 киши вирусни юқтириб олгани ҳақида маълум қилди.
Шунингдек, Хитой давлат соғлиқни сақлаш қўмитаси мамлакатда коронавируснинг янги турини юқтирганларнинг қарийб 46 фоизи тузалгани ва касалхонадан чиқарилгани ҳақида хабар берди.
Хитой расмийлари катта пул мукофотларини ваъда қилиб, аҳолини тиббий кўрикдан ўтишга жалб қилмоқда. Цяньцзян шаҳри раҳбарияти шифокор қабулига келган ҳар бир кишига бир минг юань, организмида коронавирус аниқланган ҳар бири кишига эса 10 минг юань таклиф қилмоқда.
Хитойлик таниқли актёр, режиссёр, каскадёр ва сценарийнавис Жеки Чан ўзининг коронавирус билан касаллангани ҳақида тарқалган хабарларга изоҳ берди. «Ҳаммага мен ҳақимда қайғуришгани учун ташаккуримни изҳор этаман. Илтимос, хавотирга тушманг, мен карантинда эмасман. Қолганлар ҳам хавфсиз ерда, соғ-саломат бўлишни тилайман!» — деб ёзган Жеки Чан Instagram’да.
Ўзбекистондаги вазият
Ўзбекистон соғлиқни сақлаш вазири коронавирус муҳокамасига бағишланган видеоселектор йиғилиши ўтказди. Вазирлик Ўзбекистонда коронавируснинг олдини олишда амалга оширилаётган ишлар хотиржам бўлишга асос бўлмаслиги, огоҳ бўлишга, жумладан, шахсий гигиена қоидаларига қатъий риоя қилишга чақирмоқда.
Кўришни қатъий тавсия қиламиз: Маккадаги ниқоб таққан зиёратчилар, ҳароратни ўлчовчи робот, ёнган дарахтдан чиққан куртак. 27 февралнинг энг қизиқарли суратлари
Бироқ Жаҳон соғлиқни сақлаш ташкилоти раҳбари Тедрос Гебрейесус ҳеч бир давлат коронавирусдан холи эканлигига ўзини ишонтирмаслиги кераклигини маълум қилди. «Мамлакатда коронавирус инфекцияси билан касалланиш ҳолати умуман бўлмаслигини тахмин қилиш том маънода ҳалокатли хато ҳисобланади», — дейди Гебрейесус.
Uzbekistan Airways авиакомпаниясининг Тошкентдан Жидда ва Мадинага бўлган барча қатновлари 2020 йилнинг 27 февралидан бошлаб вақтинчалик тўхтатилди. Бунга 25 та давлат, жумладан, Ўзбекистондан келган турист ва зиёратчиларнинг Саудия Арабистонига кириши вақтинчалик ман этилгани сабаб бўлган. Саудия ҳукумати ушбу қарорни мамлакат COVID-19 коронавируси тарқалишининг хавфини олдини олиш зарурлиги билан изоҳлаган. Шунингдек, Саудия Арабистони яна 7 та давлат фуқароларига сайёҳлик визасини беришни тўхтатиб қўйди. Булар — Хитой, Япония, Сингапур, Жанубий Корея, Малайзия, Италия ва Қозоғистон давлатларидир.
Жаҳондаги вазият
Жанубий Кореяда коронавирус билан касалланганлар сони 2 минг кишидан ошиб кетди. Коронавирус билан касалланган яна 256 та янги ҳолат қайд этилди.
Эронда хотин-қизлар ва оила масалалари бўйича вице-президент Маъсума Эбтекар COVID-19 коронавирусини юқтириб олганини тан олди. Эбтекар Эрон ислом республикасида янги турдаги вирус қайд этилган биринчи сиёсатчи эмас. Топширилган тест натижалари Эрон Мажлисининг миллий хавфсизлик масалалари қўмитаси раҳбари Мужоб Зоннур, депутат Маҳдум Содиқийда ҳам ижобий натижа кўрсатган. Шунингдек, Эронда соғлиқни сақлаш вазири ўринбосари Ирож Харирчи ҳам коронавирус билан касалланган. Эроннинг Ватикан ва Эрон давлатларидаги собиқ элчиси Хади Хисравшоҳий эса коронваирус билан касалланиб вафот этди.
ЖССТ маълумотларига кўра, Эронда 245 нафар одам коронавирус билан касалланган, шундан 26 та вазиятда ўлим ҳолати кузатилган.
АҚШ вице-президенти Майк Пенс Оқ уйнинг коронавирус тарқалишига қарши кураш бўйича координатори лавозимига Дебби Бирксни тайинлади, у аввал ОИВ/ОИТС эпидемиясига қарши курашиш муаммолари бўйича ҳукумат сиёсатини олиб борган.
Швейцарияда коронавирус сабаб Женева автосалони бекор қилинди. Швейцарияда 28 февраль ҳолатига кўра, коронавирус инфекциясини юқтириб олиш билан боғлиқ 15 та ҳолат аниқланди.
Францияда соғлиқни сақлаш вазири Оливье Веранга кўра, COVID-19 коронавируси билан касалланган беморлар сони қарийб икки баравар кўпайиб, 27 февраль ҳолати бўйича 38 нафарни ташкил қилмоқда.
Мавзуга доир: Коронавирус Европа бўйлаб тарқалишда давом этмоқда
Озарбайжонда Россия фуқаросида коронавирус аниқланди. Бу коронавирус юқтириб олиш билан боғлиқ Озарбайжондаги илк ҳолатдир.
Bank of America йил сўнгида охирги иқтисодий инқироздан ҳам оғир дамлар келишини тахмин қилди. Маълумотларга кўра, иқтисодий ўсиш суръатлари йил охирида 2,8 фоизгача пастлайди, 2009 йилдан бери ушбу кўрсаткич мунтазам равишда ўсиб келаётганди ва доим 3 фоиздан юқори бўлаётганди. Бундай пастлашнинг асосий сабабларидан бири сифатида коронавирус эпидемияси оқибатида Хитой иқтисодиётидаги секинлашув кузатилгани деб баҳоланмоқда.
Футбол
Коронавирус сабаб «Ювентус»—«Интер» ва А Сериянинг яна тўртта ўйини томошабинларсиз ўтади. Коронавирус сабаб «Пахтакор»нинг ОЧЛдаги ўйини қолдирилди.
Мазкур баҳс 3 март, сешанба куни, Саудия Арабистонида ўтказилиши керак эди. Бироқ коронавирус сабаб Саудия Арабистони чет элликларга виза беришни тўхтатиб қўйганди.
Изоҳ (0)