Корейс дорамалари бутун дунё бўйлаб миллионлаб томошабинлар қалбини забт этди, Туркия ҳам бундан мустасно эмас. Оила ва анъаналарга ҳурмат каби маданий қадриятларнинг ўхшашлиги туфайли корейс сюжетлари турк аудиториясига манзур келди. Турк продюсерлари машҳур корейс сериалларини ўзларига мослаштириб, баъзан асл нусхадан кам бўлмаган муваффақиятга эришадиган қайта ишланган версияларни яратмоқда.
“Никоҳ” ва “Бевафо”
“Никоҳ” дорамаси 2020 йил март ойида эфирга чиқди. Эрининг хиёнатидан сўнг оиласи парчаланиб кетган аёл шифокор ролини Ким Хи Э ижро этган. Сюжет марказида оилавий инқироз, қасос ва руҳий яраларни даволаш ётади. Бош рол ижрочиси “Энг яхши аёл роли учун” Baeksang Arts Awards мукофотига сазовор бўлган.
Мазкур фильмнинг туркча варианати — “Бевафо” 2020 йил октябридан 2022 йил майигача Канал Д телеканалида эфирга узатилган. Асосий қаҳрамон — Жансу Дере ижросидаги доктор Ася. Унинг оилавий ҳаёти эрининг хиёнатини билиб қолганидан сўнг издан чиқади.
“Доктор Чха” ва “Баҳор”
“Доктор Чха” сериали узоқ йиллар давомида уй бекаси бўлган, бироқ 20 йилдан сўнг шифокорлик фаолиятига қайтган аёл ҳақида ҳикоя қилади. У ўзининг касбий фаолиятини тиклашга уриниш жараёнида оилавий можароларга ва эрининг хиёнатига дуч келади. Бош ролни Ом Жонг Хва маҳорат билан ижро этган.
2024 йилда Туркияда “Баҳор” номли сериал тақдим этилди. Бош ролни Демет Эвгар, асосий эркак ролини эса Бугра Гулсой ижро этди. Сюжет бўйича, бош қаҳрамон тиббиётга қайтади ва аста-секин янги қадриятлар тизимини шакллантиради. Воқеалар турк маданияти контекстига сингдирилган: бу ерда аёлнинг эрга қарамлиги ва ўз мустақиллиги учун кураши мавзуси алоҳида акс эттирилган. Эвгар, айниқса, оиласи билан тўқнашув саҳналарида, ишончли ва кучли ижроси учун кўплаб ижобий баҳолар олди.
“У гўзал эди” ва “Севади, севмайди”
Жанубий Кореянинг “У гўзал эди” сериали Туркиянинг “Севади, севмайди” лойиҳасига асос бўлган. Уларнинг сюжети ўхшаш: ҳаётда омади чопмаган аёл болаликдаги дугонасини учратиб қолади. Томошабинлар кореялик Ким образига ўхшаш Дениз ролини ижро этган актриса ва Йигит ролини ижро этган актёрнинг маҳоратини алоҳида таъкидлашган.
Аёл аввалига ҳаяжон ва ишончсизлик билан яшарди, аста-секин кучли шахс сифатида ўзини намоён эта бошлайди — бу эса ремейкнинг таъсирчан ҳиссий асосига айланади. Томошабинлар ҳар иккала версияни ҳам илиқ кутиб олишди, бироқ турк версияси ижтимоий тармоқларда таъсирли диалоглар ва кучайтирилган драма туфайли кўпроқ муҳокама қилинди.
“Шифокорлар” ва “Юрак уриши”
“Шифокорлар” номли корейс дорамасида оғир феъл-атворли қиз ва ундаги истеъдодни кўра олган иқтидорли шифокор йигит ҳақида ҳикоя қилинади. “Юрак уриши” номли турк сериали ҳам шу схемани такрорлайди: Али Асаф Эйлулга шифокор бўлишида ёрдам беради. Кўп йиллар ўтгач, улар Истанбулдаги энг нуфузли шифохоналардан бирида қайта учрашади.
Изоҳ (0)