Японияда жорий этилаётган қатъий қоидалар иш берувчиларни ходимларини экстремал ҳароратдан етарли даражада ҳимоя қилмаганлиги учун жаримага тортишга олиб келади. Бу ҳақда Тhe Japan Times хабар бермоқда.
Маълум қилинишича, 1 июндан кучга кирган янги таҳрирдаги қонун жазирама шароитида ишчилар хавфсизлигини таъминлаш бўйича миллий даражадаги сиёсатнинг дунёда камдан-кам учрайдиган намунаси ҳисобланади.
Япония Соғлиқни сақлаш вазирлиги маълумотларига кўра, ўтган йили ишлаб чиқаришдаги юқори ҳарорат туфайли 30 киши ҳалок бўлган ва 1200 га яқин киши жароҳат олган. Жабрланганларнинг аксарияти қурилиш ёки ишлаб чиқариш соҳаларида ишлаган.
Вазирлик баёнотида айтилишича, ҳукумат ўтган ёзда, июль ойида тарихдаги энг юқори ҳарорат қайд этилган жазирама иссиқдан сўнг, ҳимояни кучайтириш чораларини кўрган. Агар ҳимоя чоралари етарли бўлмаса, корхоналарга 500 минг иена (3475 доллар) миқдорида жарима солиш кўзда тутилган.
Жаҳон соғлиқни сақлаш ташкилотининг ўтган йилги ҳисоботига кўра, 2000-2019 йиллар оралиғида ҳар йили иссиқлик уришидан ярим миллионга яқин ўлим ҳолати қайд этилган.
Аҳоли саломатлигига таъсири билан бир қаторда, ҳароратнинг кўтарилиши меҳнат унумдорлигига таъсир қилиши мумкин ва иссиқлик тўлқинлари келтириб чиқарадиган иқтисодий зарар тобора кўпроқ ташвиш уйғотмоқда.
Япония қонунчилиги иш берувчилардан иссиқлик уриши аломатларини тезда аниқлаш ва ишчиларга ёрдам кўрсатиш имконини берувчи протоколларни жорий этишни талаб қилади. Сиёсатчилар компанияларни иш жойларида ҳамкорлик тизимини қўллашга, ходимларни кузатиш учун тақиладиган қурилмаларни тарқатишга ва касалхоналар ёки клиникаларга шошилинч ташишни таъминлашга ундамоқда.
Иш берувчилар ҳарорат ва намлик каби омилларни ҳисобга олган ҳолда тўғридан-тўғри қуёш нури остида иссиқлик стрессини кўрсатувчи Wet Bulb Globe Temperature индексини кузатиб боришлари тавсия этилади. Индекс қиймати бир соатдан ортиқ ёки кун давомида жами тўрт ва ундан кўп соат мобайнида 28°C дан ёки ҳаво ҳарорати 31°C дан юқори бўлган иш жойларида махсус чоралар кўриш талаб этилади.
Изоҳ (0)