Ўзбекистон либерал-демократик партиясидан Ўзбекистон Республикаси Президентлигига номзод Шавкат Мирзиёев самарқандлик сайловчилар билан учрашув чоғида келгуси етти йилда туризмни ривожлантиришга оид режалар ҳақида тўхталди.
“Туризм соҳасида яратилган 1 та янги иш ўрни, бошқа соҳаларда яна 2 та иш ўрни пайдо бўлишига туртки беради. Очиқ айтадиган бўлсак, жазирама иссиқ ва изғирин совуқда, ҳаммани пахтага мажбурий сафарбар этган йилларда ҳам, Ўзбекистон пахта толасининг экспорти 1 миллиард доллардан ошмаган”, — деди номзод.
Шавкат Мирзиёев ҳозирги кунда туризм экспорти бу маррадан ошиб ўтганини айтди. “Агар уни 3-4 баробар оширсак, жайдари қилиб айтганда, “пахта экмасак” ҳам бўлаверади”, — дейди номзод.
Шунга кўра:
- барча халқаро аэропортларда хорижий туристларга Ўзбекистонда сотиб олган маҳсулоти учун қўшилган қиймат солиғини қайтариб бериш йўлга қўйилади;
- хориждан турист олиб келган тур-операторларга экспортчи корхоналар каби, қўшилган қиймат солиғи тўлиқ қайтариб берилади;
- тур-операторлар транспортига шаҳардаги туристик маршрут ва объектларга бориш учун қулай ҳаракатланиш шароитлари таъминланади;
- чет элдан олиб келинган туристик транспорт воситалари учун қўшилган қиймат солиғини 3 йил ичида фоизсиз ва бўлиб-бўлиб тўлашга рухсат берилади.
Шавкат Мирзиёев водийдан Тошкент, Нукус, Бухоро ва Урганч шаҳарларига кунлик авиарейслар кўпайтирилишини айтди.
“Ички туризмни рағбатлантиришга алоҳида эътибор қаратамиз. 2030 йилга бориб, камида 25 миллион аҳолимиз мамлакатимиз бўйлаб саёҳат қилиши учун барча имкониятлар ишга солинади”, — деди номзод.
Хусусий шериклик асосида:
- мамлакат миқёсида шаҳарлараро автобус қатновини таъминлайдиган компаниялар ташкил этилади;
- водийнинг туман ва шаҳарларини боғловчи “Олтин водий сайёҳлик ҳалқаси”, Хоразм ва Қорақалпоғистон бўйлаб “Қалъалар ҳалқаси” каби янги туристик йўналишлар очилади;
яхши қўшничилик сиёсати давом эттирилиб, Наманганда Нанай ва Фарғонада Шоҳимардон ҳудудларининг туризм салоҳияти тўлиқ ишга солинади;
- ҳудудларда яна 4 мингта меҳмонхона, меҳмон уйлари ва ҳостеллар ташкил этилиб, меҳмон ўринлари сони камида 2 баробар оширилади.
Изоҳ (0)