Ўзбекистондаги биринчи муз саройи 1970 йилда барпо этилган бўлиб, «Юбилейный» номи билан юритилган бу масканда Тошкентнинг «Бинокор» хоккей жамоаси ҳамда фигурали учиш усталари машғулотлар олиб бориш имкониятига эга бўлган. «Бинокор» жамоаси эса хоккей бўйича Собиқ Иттифоқ биринчиликларида иштирок этган, Ўзбекистондан ўша йиллари ажойиб фигурали учиш усталари етишиб чиққан. Афсуски ўтган асрнинг 90 йилларида ушбу маскан эгасиз ва қаровсиз ҳолатда қолди. Шундан сўнг фаолиятини тўхтатишга мажбур бўлди.
Қурилиш ишлари қай даражада?
Ўзбекистонда кўп тармоқли Ҳумо муз саройини барпо этиш ғояси давлат раҳбари Шавкат Мирзиёевга тегишли бўлиб, мажмуани қуриш ишлари 2017 йилнинг январь ойидан бошланган. Бугунги кунда кўп тармоқли Ҳумо муз саройида қарийб 80—85 фоизлик ишлар бажариб бўлинган. Агар ҳаммаси рисоладагидек кетадиган бўлса, қурувчилар ушбу муҳташам спорт мажмуасини баҳорнинг илк ойида фойдаланишга топшириши кутилмоқда. Шу мақсадда мажмуада 300 га яқин ишчи икки сменада меҳнат қилмоқда.
Аслида лойиҳани 2018 йилнинг охирида якунлаш режалаштирилган эди. Бироқ, баъзи сабабларга кўра қурилиш ишлари чўзилмоқда. Муҳими — қурувчилар шошма-шошарликка йўл қўйиб, «мендан кетгунча, эгасига етгунча», қабилида иш юритиб, иншоотни сифатсиз ҳолда фойдаланишга топширишга интилмаяпти, аксинча, ҳар жиҳатдан пишиқ ва асосийси халқаро талабларга жавоб берадиган қилиб қуришга ҳаракат қилмоқда.
Нега мажмуа Ҳумо деб номланди?
Лойиҳачилар иншоот дизайнини яратишда ўзбек халқ эртакларидаги севги-муҳаббат, бахт ва ҳурлик рамзи — Ҳумо қушига эътибор қаратган. Лойиҳага кўра саёҳат йўлакчалари дизайни Ҳумо қушининг қанотларига ўхшатиб қурилади. Юқоридан қараганда мажмуа шу афсонавий қушни эслатиб юборади. Шу боис кўп тармоқли муз саройига Humo Arena номи берилди.
Муз саройида яна қайси спорт турлари ўйналиши мумкин?
Савол туғилиши мумкин: нега мажмуа кўп тармоқли Humo Arena муз саройи, деб номланган? Мажмуанинг бош аренаси қишки спорт турларидан бўлмиш хоккей, фигурали учиш, шорт-трек, кёрлинг бўйича мусобақаларни ўтказишга мўлжалланган. Бу спорт турлари муз устида ўйналади. Шу билан бирга ушбу аренада спортнинг баскетбол, волейбол, гандбол, футзал, қолаверса бокс ва таэквондо йўналишлари бўйича ҳам мусобақалар ўтказиш мумкин. Муз устида бу спорт турлари қандай ўйналиши сизни таажжублантираётган бўлиши табиий. Ажабланишга ҳожат йўқ, бунинг йўли жуда осон. Муз майдони устига махсус қоплама, яъни гиламга ўхшаш мато тўшалади. У музга шикаст етишининг олдини олади. Кейин эса майдон устига ўйин турлари учун махсус паркет, бокс учун ринг ёки таэквондо даянини тўшаш ҳамда мусобақани ўтказиш мумкин. Қолаверса худди шу усулда концерт саҳнаси қуриш ва томоша кўрсатиш имконияти ҳам мавжуд. Шунинг учун ҳам мажмуа кўп тармоқли муз саройи, деб юритилади.
Humo Arena’нинг имкониятлари
Мажмуанинг бош аренаси 12 500 томошабинни ўз бағрига сиғдира олади. Шунингдек, бу мажмуада 300 ўринга мўлжалланган кичик арена, яъни машғулотлар майдони ҳам барпо этилади. Кичик арена асосан қишки спорт турлари билан шуғулланиш учун мўлжалланган. Дарвоқе, ҳар икки муз майдонининг ўлчамлари 60×30 метрни ташкил қилиб, бу Олимпия талабларига тўлиқ жавоб беради.
Кўп тармоқли Humo Arena муз саройи ер остида битта ва ер устида олтита қаватдан иборат бўлиб, умумий майдони 82 250 метр квадратга тенг. Бинонинг баландлиги эса 40 метрни ташкил этади. Мажмуанинг ер ости қаватидан ишчи-ходимлар учун ечиниш ва ювиниш хоналари ўрин олади. Ушбу мажмуа ўз ичига спорт музейи, тренажёр заллари, фитнес-марказни ҳам қамраб олиши кўзда тутилган. Бундан ташқари, мажмуада томошабинлар учун барча қулайликлар муҳайё этилади. Бу ерга келган фуқаролар ёки хорижлик меҳмонлар учун спорт дўкони, ёпиқ болалар майдончаси, буфет ва ресторанлар, тиббиёт хоналари, ҳожатхоналар хизмат кўрсатади. Шуни таъкидлаш жоиз, умумий хизмат кўрсатиш масканлари ҳар бир қаватда барпо этилади.
Яна бир эътиборга молик жиҳат, кўп тармоқли Humo Arena муз саройига шахсий автоуловида келадиган меҳмонлар машинасини қаерга жойлаштириш борасида ғам чекишига ҳожат йўқ, чунки бу ерда қарийб 1 500 та автомобилга мўлжалланган автотураргоҳ ҳам барпо этилади.
Сир эмаски, Ўзбекистонда йилнинг аксарият пайтида ҳаво иссиқ бўлади, айниқса ёзнинг жазирамасида ҳарорат қарийб 50 даражага кўтарилади. Хўш, бундай пайтда Humo Arena муз майдони музли қоплама қандай ушлаб турилади? Маълумки, сув 0 даражада музлайди, унинг янада жипслашиши учун эса ҳарорат 0 даражадан паст бўлиши керак. Ушбу мажмуада муз қопламаси эриб кетмаслиги учун ҳаво ҳарорати -6 даража атрофида ушлаб турилади.
Хорижий ҳамкорлар борасида
Кўп тармоқли Humo Arena муз саройи қурилишида ўндан ортиқ хорижий фирма ва компаниялар билан ҳамкорлик қилинмоқда. Жумладан, мажмуанинг муз майдонини қуриш ишларига Proftexnology компанияси масъул саналса, бинонинг фасад қисми Германиянинг Zambila компанияси томонидан барпо қилинмоқда. Шунингдек, бино қурилишида дунёга машҳур Австриянинг Oberhofer, Россиянинг «Бриг» ҳамда «Пи Арена», Испаниянинг Euro Seating каби компания ва фирмалари ўз хизмат турлари билан қатнашмоқда.
Изоҳ (0)