Уйлар жонланиб, қаҳрамонлар сиз билан суҳбатлашаётган ғиштчалардан қурилган шаҳар бўйлаб юрганингизни тасаввур қилинг. Бундай эртаксимон кўнгилочар боғ 5 июль куни Шанхайда ўз эшикларини очади. У 30 гектардан ортиқ майдонни эгаллаб, бренд тарихидаги энг йирик паркка айланди. Маҳаллий истеъдодларнинг рақамли ечимлари яъни интерактив, 3D, аниматроника технологиялари алоҳида эътиборга лойиқ. Ҳатто меҳмонхона хоналари ҳам бу ерда кичик конструкторларга ўхшаб кетади.
Шанхайда 2025 йилнинг ёз ойида дунёдаги энг йирик Legoland кўнгилочар боғи очилмоқда. Тўлиқ ишга тушириш 5 июлга режалаштирилган, аммо тайёргарлик ишлари аллақачон бошланган. Янги мажмуа шаҳарнинг жануби-ғарбида, Жиншан туманида жойлашган. Лойиҳа қарийб 550 миллион долларга тушган. Ҳисоб-китобларга кўра, бу ерга йилига 2,5 миллионгача ташриф буюрувчи келиши кутилмоқда.
Ҳудуд майдони 30 гектардан ортиқ. Унда ҳар бири ўз сюжети, дизайни ва фаолиятига эга саккизта зона қурилган. Бу ерда нафақат анъанавий арғимчоқ ва сирпанчиқлар — аксарият объектлар инсон ҳаракатларига жавоб беради: механизмларни ишга тушириш, конструкцияларни йиғиш, анимацион қаҳрамонлар билан мулоқот қилиш мумкин. Жонли элементлар LEGO қисмларидан йиғилган бинолар ва ҳайкаллар билан ўралган. Уларнинг умумий сони 85 миллиондан ортиқ бўлиб, бир қисми ўрнатилган сенсорлар ва ёруғлик диодлари ёрдамида бошқарилади.
Парк кўринишидан ўйинчоқлардан қурилган жонли шаҳарни эслатади: қасрлар, станциялар, сув ости манзаралари, космик базалар. Аммо чиройли кўриниш ортида ақл-идрок ётибди — айрим ҳудудларда сенсорли панеллар ва проексион дисплейлар ўрнатилган. Бола тугмани босиши билан бино “жонланади”: деразаларда чироқ ёнади, мўрилардан буғ чиқади, кичик фигуралар гапира бошлайди. Тўлиқ рақамли стендлар ҳам бор — масалан, ўз тўпламингизни лойиҳалаштириб, кейин уни 3D форматда қандайлигии кўришингиз мумкин. Ёки юзингизни ўйин автоматига юклаб, у сизни LEGO-одамчага айлантириб қўйиши мумкин.
Аттракционлардан ташқари, бу ерда конструктор услубидаги 250 хонали меҳмонхона, кафелар ва сувенир дўконлари мавжуд. Кўп нарсалар болалар билан биргаликда дам олишга мўлжалланган: хоналарда алоҳида ўйин майдонлари бор, ресторанларда эса тўғридан-тўғри стол устида ижод қилиш учун махсус тўпламлар берилади. Шу билан бирга, катталар ҳам бу ерда кўриш учун қизиқарли нарсалар топишлари мумкин — техник ечимлар ҳайратланарли: аниматроника, ёруғлик шоулари, мувофиқлаштирилган овозлар ва ҳаракатлар шулар жумласидандир.
Шанхайдаги Legoland қурилиши 2021 йилда бошланган. Бу шаҳарни оилавий туризм марказига айлантириш режасининг бир қисмидир. Ҳозирда бу ҳудудда йирик Дисней парки ва Ҳаичанг денгиз мажмуаси қурилган. Янги объект умумий жозибадорликни ошириши керак. Энди мегаполисга бир ташриф билан уч хил оламга кириш осон бўлди — мультфильм қаҳрамонлари билан мулоқот қилиш ва кубиклар дунёсига шўнғиш мумкин.
Дастлабки ташриф буюрувчилар ҳамма нарса ақл бовар қилмайдиган даражада ташкил этилганини кўриб улгуришди. Синов кунлари режадагидек давом этмоқда: муҳандислар тизимларни текширмоқда, ходимлар машқ қилмоқда ва кичик носозликлар бартараф этилмоқда. Амалга оширилган ишлар ёрқин, улкан ва эртаксимон кўринади. Очилиш маросими шов-шувли бўлиши кутилмоқда — ва кўламига қараганда, Legoland Осиёдаги энг технологик парклардан бири сифатида ном қозонади. Бутун оила билан саёҳатга чиқиш вақти келмадимикин?
Изоҳ (0)