Бурж Халифа ва Empire State Building биносини бир вақтда қандай кўриш мумкинлигини биласизми? Йўқ, интернетдаги расм ва видеоларда эмас. Бунинг учун 25 майдан 22 сентябргача Сиэтлда бўлиб ўтадиган Towers of Tomorrow — Lego кўргазмасига ташриф буюришингиз мумкин. Lego’дан ясалган архитектура намуналарига қизиқувчиларни бу ерда кўплаб қизиқарли дастурлар кутмоқда.
Ушбу ажойиб кўргазма дунёдаги энг машҳур ва инновацион осмонўпар биноларнинг ҳамда барча учун севимли Lego қурилиш материалининг комбинациясидир. Унда Шимолий Америка, Осиё ва Австралиянинг меъморий обидалари ва бинолари намойиш этилади, — дейилади расмий сайтда.
Кўргазма ташкилотчиси Жанубий Уэлс тарих ва саноат музейи бўлиб, унда Райан Макнот бош архитектор сифатида иштирок эди. У Lego бўйича сертификатга эга мутахассис бўлиб, дунёда атиги 21 кишида шундай сертификат мавжуд.
Райан жамоаси билан биргаликда кўргазма учун 18 та машҳур бинолар макетини, жумладан, Бурж Халифа, Empire State Building, Petronas эгизак минораларини қурди. Уларга жами 577 000 дан ортиқ деталлар кетди. Lego қисмларининг аксарияти замонавий Хитойнинг рамзи бўлган Шанхай минораси учун ишлатилди. Маълум бўлишича, унинг нархи 100 000 доллардан ошади.
Lego’нинг Towers of Tomorrow кўргазмасига ташриф буюрувчилар нафақат макетларни томоша қилиши, балки ўзлари ҳам бирор нарса қуриши мумкин. Бунинг учун ташкилотчилар 200 000 қисмдан иборат махсус майдонлар тайёрлаб қўйди.
Lego билан ишлашда болалар ҳам, катталар ҳам дизайн ва архитектурадан кўп нарсани ўрганиши мумкин. Мантиқий ёндашув ва ижодкорликни талаб этадиган мазкур ўйин барчага бирдек манзур бўлади, — деди Тарих ва саноат музейида кўргазмалар ва таржима хизматлари бошлиғи Девора Романек.
Изоҳ (0)