Хитой бош вазири Ли Сян сунъий интеллект (СИ) хавфсизлик билан мувозанатлашиши зарурлигини таъкидлаб, халқаро ҳамжамиятни бу борада ҳамкорликка чақирди. Бу ҳақда Daily Sabah хабар берди.
Вазир бу таклифини Шанхайда бўлиб ўтаётган “Жаҳон сунъий интеллект конференцияси”да (WAIC) маълум қилган. Олдинроқ АҚШ президенти Дональд Трамп “СИ соҳасида тартибга солишни камайтириш стратегияси”ни илгари сурганди. Хитой расмийси айнан шу сабаб ҳам глобал келишувга эришиш муҳимлигини айтмоқда. Ли шунингдек, Шанхайда янги халқаро СИ ташкилотига асос солинишини маълум қилган.
Конференцияда иштирок этган Нобель мукофоти совриндори, физик Жеффри Хинтон СИни “ёқимтой йўлбарс боласи”га қиёслаб, уни эҳтиёткорлик билан бошқариш зарурлигини таъкидлаган.
Ли Сян ушбу ҳамкорлик доирасида Хитойнинг СИ ютуқларини ривожланаётган давлатлар билан бўлишишга тайёр эканини билдирган. Бу билан вазир технологияни бир неча давлат ва компаниялар монополияси таъсири остида қолишига қаршилик қилишни мақсад қилган.
Бу орада АҚШ илғор чиплар экспортини чеклаб, Хитойнинг СИ соҳасидаги ривожланишини сусайтиришга ҳаракат қилмоқда. Конференцияда нутқ сўзлаган Ли Сян СИ ривожида чип етишмовчилиги катта муаммо эканини қўшимча қилган. Тадбирда онлайн иштирок этган БМТ бош котиби Антонио Гутерриш эса СИ бошқаруви халқаро ҳамкорлик учун “ҳал қилувчи синов” эканини билдирган.
Бундан олдин февраль ойида Парижда ўтган шу каби саммитда 58 та мамлакат СИ бошқарувида ҳамкорлик қилиш ташаббуси билан чиққан эди. Аммо АҚШ ва Буюк Британия “ортиқча тартиб” тизимига қаршилик кўрсатган.
Изоҳ (0)