Бирлашган Миллатлар Ташкилоти (БМТ) фаластинликларга давлат қуришда кўмаклашишга тайёрлигини маълум қилди. Бу ҳақда БМТнинг Инсон ҳуқуқлари бўйича олий комиссари Фолкер Тюрк баёнот берди.
Май ойида Франция президенти Эммануэл Макрон, Буюк Британия бош вазири Кир Стармер ва Канада бош вазири Марк Карни қўшма баёнот эълон қилганди. Унда расмийлар Фаластин давлатини тан олишга қатъий қарор қилганини маълум қилган. Улар “икки давлат ечими”ни амалга ошириш учун бошқа давлатлар билан ҳамкорлик қилишга тайёрлигини билдирган.
Шунингдек, Франция президенти 24 июль куни БМТнинг сентябрь ойида бўлиб ўтадиган саммитида Фаластин давлатини расман тан олишини маълум қилган. Фаластин расмийлари Макроннинг қарорини олқишлаган бўлса, Исроил бош вазири Биньямин Нетаньяху бу қадам “террорни мукофотлаш” эканини айтган. АҚШ давлат котиби Марко Рубио Макроннинг баёнотини қатъиян рад этиб, унинг қарорини бепарволикка йўйган.
Бугунги кунга келиб, Фаластин давлатини дунё бўйлаб 147 та мамлакат тан олган. Улар орасида АҚШ мавжуд эмас. У 2024 йилда Фаластиннинг БМТга тўлақонли аъзо бўлишини вето қилганди. Худди шу йилдан бошлаб Фаластинни Ирландия, Норвегия, Испания ва Арманистон каби 10 та давлат тан олган.
Изоҳ (0)