Инновацион ривожланиш вазирлиги, Истеъдодли ёшларни қўллаб-қувватлаш Улуғбек жамғармаси ҳамда Ёшлар иттифоқи билан ҳамкорликда иқтидорли ёш робототехниклар ўртасида ўтказилган «RoboCUP» телевизион мусобақаси ўз якунига етди. Бу ҳақда «Дарё»га вазирлик матбуот хизмати маълум қилди.
Жорий йил 11 июнь куни «Mening Yurtim» телеканалида «RoboCUP» мусобақасининг финал кўрсатуви намойиш этилди. Мусобақа Робо-сумо ҳамда Робо-футбол йўналишидан иборат бўлиб, 2 ёш тоифаси, яъни 16 ёшгача бўлган болалар ҳамда 16 ёшдан 22 ёшгача бўлган ўсмирлар ўртасида ўтказилди.
Робо-сумо йўналишида икки нафар иштирокчидан иборат ҳар бир жамоа Ардуино платформаси асосида роботлар яратди ва роботлар марду майдонда ўз кучларини синади. Икки ой давом этган телевизион мусобақанинг финалига чиққан Жавоҳир Раҳимов ва Иброҳим Султонов ғалаба қозониб, Хитойнинг Аsian Science Camp оромгоҳига йўлланмани қўлга киритди.
Робо-футбол йўналишдаги мусобақа Lego конструкторлари ёрдамида ясалган роботлар ўртасида бўлиб ўтди. Бу йўналишда Just robotics жамоаси ғолиб деб топилди. Жамоа аъзолари Ҳабибуллоҳ Акромжонов ва Асрорхўжа Ғанихўжаев Турин политехника университетига кириш имтиҳонларида қўшимча 30 фоиз имтиёзга эга бўлиш имкониятига эга бўлди. Ғолиб жамоа аъзолари мазкур имтиёздан исталган пайт фойдаланишлари мумкин.
Бундан ташқари икки йўналиш бўйича ҳам биринчи, иккинчи ва учинчи ўринлар соҳибларига махсус диплом ва эсдалик совғалари топширилди.
Изоҳ (0)