Жуда кўп миқдордаги фирибгарлик учун қидирувда бўлган Ўзбекистон фуқароси АҚШда қўлга олиниб, депортация қилинди, деб хабар бермоқда Интерполнинг Ўзбекистондаги Миллий марказий бюроси.
Қайд этилишича, ушбу шахс Ўзбекистон Интерпол Миллий марказий бюросининг ахборот кўмаги ҳамда АҚШнинг Ўзбекистондаги элчихонаси билан яқин ҳамкорлиги туфайли қўлга олиниб, мамлакатдан чиқариб юборилди.
У Жиноят кодексининг 168-моддаси, 4-қисмида (жуда кўп миқдорда фирибгарлик) назарда тутилган жиноят содир этганликда айбланмоқда.
Ўзбекистон Интерпол ММБ ходимлари ва АҚШнинг ваколатли органлари ўртасида ўтказилган музокаралар, қўшма тезкор ҳаракатлар ҳамда ўзаро маълумотлар алмашиш натижасида, Америка томони билан ҳамкорликда қидирув эълон қилинган шахсни мамлакат ҳудудидан чиқариб юбориш тўғрисида қарор қабул қилинди.
АҚШнинг Иммиграция ва божхона полицияси (ICE) ходимлари кузатувида жиноятчи Тошкент халқаро аэропортига келтирилди ва кейинчалик жавобгарликка тортиш мақсадида Интерполнинг Ўзбекистондаги Миллий марказий бюроси ходимларига топширилди.
Санкт Петербургда 2021 йилда содир этилган қотиллик учун қидирувда бўлган Ўзбекистон фуқароси 28 май куни Салвадордан экстрадиция қилинганди. Ўзбекистонда 9 миллион долларни талон-торож қилишда айбланган шахс Россияда ушланиб, 15 майда Ўзбекистонга экстрадиция қилинганди.
Изоҳ (0)