Покистон полицияси 31 май куни турмуш қуришдан бош тортган ўсмир қизини ўлдиришда айбланган аёлни ҳибсга олди. Бу ҳақда Покистондаги маҳаллий нашрларга таяниб, BBC хабар берди.
18 ёшли Саман Аббос 2021 йилда турмушга чиқишдан бош тортгани учун онаси томонидан ўлдирилгани хабар қилинган. Бу пайтда қиз, унинг онаси Назиа Шаҳин ҳамда отаси Шаббар Аббос Италияда яшаётган бўлган.
Содир бўлган аянчли ҳодисадан сўнг Назиа Шаҳин ҳамда Шаббар Аббос Италиядан қочиб кетган. Италия суди Назиа Шаҳинни 2023 йилнинг декабрида қотилликнинг бевосита иштирокчиси сифатида айблаб, умрбод қамоқ жазосига ҳукм қилган.
Вафот этган қизнинг отаси Шаббар Аббос 2023 йилнинг августида Покистонда маҳаллий полиция томонидан ушланган. Кейинчалик эса Италияга экстрадиция қилинган. Қизнинг онаси эса ҳали-ҳануз озодликда қолиб келаётган эди.
51 ёшли Назиа Шаҳин Интерпол ва Покистон федерал полицияси ҳамкорлигидаги операция давомида Кашмир чегарасидаги қишлоқда аниқланган. У ҳибсга олиниб, жума куни мамлакат пойтахти Исломободдаги судга экстрадиция жараёнлари учун олиб келинган.
Манбада айтилишича, вафот этган ўспирин қиз Саман Аббоснинг оиласи 2020 йилда Италиядан Покистонга кўчиб кетишни режалаштирган. Бундан мақсад қизни турмушга бериш бўлган.
Қиз Покистонга боришни ва турмуш қуришни рад этган. Оиласидагилар билан низога боргач эса уйидан қочиб кетган.
Бир муддат қочиб юргач, Новелларадаги оилавий уйига қайтган қиз тўсатдан ғойиб бўлган. Бу ҳолатдан шубҳаланган қизнинг амакиси уни излашга киришган.
Қизнинг жасади 2021 йилнинг ноябрь ойида оилавий уйидан унча узоқ бўлмаган ферма атрофидаги қабрдан топилган.
Экспертиза қиз қаттиқ бўғиш оқибатида бўйин суяги синиб, вафот этганини кўрсатган.
Изоҳ (0)