Катта миқдорда фирибгарлик содир этгани учун қидирувга берилган жиноятчи Польшадан Ўзбекистонга экстрадиция қилинди. Бу ҳақда Интерполнинг Ўзбекистондаги Миллий марказий бюроси хабар берди.
Қайд этилишича, Интерполнинг Варшава ва Тошкент Миллий марказий бюроларининг ҳамкорликдаги фаол саъй-ҳаракатлари натижасида 2022 йилнинг март ойида Польшада Интерполнинг “Қизил хабарномаси”га алоқадор шахс сифатида ҳибсга олинган, ҳуқуқ-тартибот идоралари томонидан фирибгарлик учун қидирувга берилган жиноятчи Ўзбекистонга экстрадиция қилинган.
Қидирувдаги шахс жабрланувчи Жанубий Кореяга ишлаш учун чет элга чиқиш ниятида эканини била туриб, ҳужжатларни расмийлаштириш ва мамлакатга киришга рухсат олиш бўйича ўз хизматларини таклиф қилган ва бу ишлар сарф-харажат талаб қилишини билдирган. Шу тарзда, қисқа вақт ичида фирибгар бир неча кишиларни чув туширган.
Жиноятчи пулларни ўзлаштирган ҳамда ваъдаларини бажармаган ҳолда чет давлатга қочишга муваффақ бўлган, бироқ Ўзбекистон ва Польша давлатлари ММБ ходимларининг ҳамкорликдаги ҳаракатлари натижасида қидирувдаги шахс аниқланди ва қўлга олинган.
“Ўзбекистон Бош прокуратурасининг экстрадиция тўғрисидаги сўрови қаноатлантирилгандан сўнг, Интерпол ходимлари ҳамроҳлигида шу кунларда жиноятчи Ўзбекистонга олиб келинди, уни олдинда адолатли суд кутмоқда”, — дейилади хабарда.
Экстрадиция ҳолатлари
2023 йилнинг март ўрталарида Латвияда ўзини элчихона ходими сифатида таништириб, одамларни чув тушириб юрган Ўзбекистон фуқаросини экстрадиция қилингани тўғрисида хабар берилганди. Шунингдек, март охирларида Интерполнинг Ўзбекистондаги Миллий марказий бюроси ходимлари томонидан халқаро қидирувда бўлган шахсни экстрадиция қилиш Швециядан биринчи марта амалга оширилди.
Апрель бошида эса Москва шаҳрида 13 йил олдин Ўзбекистонда содир этган жинояти учун халқаро қидирувда бўлган шахс қўлга олинганди.
Изоҳ (0)