Туркиялик машҳур актёр Бурак Ўзчивит ўзининг Instagram саҳифасида янги суратини эълон қилди. 40 ёшли актёр имижини янгилаб, соқолини олган.
Мухлислар дарҳол актёрнинг янгиланган кўринишини ижобий баҳолаб, у соқолсиз анча ёшроқ кўринаётганини таъкидлашди. Кўпчилик бу образ унга янада кўпроқ ярашишини ёзмоқда:
“Вой, Бурак 27 ёшга тўлган йигитга ўхшайди!”,
“Ишониш қийин, бир зумда шунчалик ёшариб кетиш мумкинми?”,
“Камол даври қайтди”, каби изоҳлар ижтимоий тармоқларда кўпайди.
Айниқса, “Севги изтироби” сериалидаги Камол образи билан машҳур бўлган актёрнинг мухлислари уни айнан шу кўринишда бўлишини соғинганини яширмади. Уларнинг фикрича, Ўзчивит соқолсиз ҳолатда айнан ўша даврдаги образини эслатади.
“Чолиқуши”, “Муҳташам юз йил”, “Севги изтироби” сериалларининг юлдузи Бурак Ўзчивит актёрлик фаолиятини 2006 йилда бошлаган. У 2017 йилда ҳамкасби ва актриса Фаҳрие Эвжен билан турмуш қурган. Уларнинг икки нафар ўғли бор.
Сўнгги йилларда Ўзчивит “Ҳукмдор Усмон” номли тарихий сериалида бош ролни ижро этиб келмоқда. Бурак дунё бўйлаб турли тадбирларда, жумладан, Тошкентга ташриф буюрганида ҳам, эъзозли меҳмон сифатида кутиб олинган. Шунингдек, у Россиянинг Янги йил ҳақидаги “Арча 11” фильмида ҳам иштирок этган.
Изоҳ (0)