Тошкент йўлларида яна бир йўл чизмаси синов тариқасида ётқизилмоқда, деб хабар бермоқда пойтахт ИИББ матбуот хизмати.
Аввал хабар берилганидек, шаҳар йўлларида тирбандлик билан курашиш учун синов тариқасида янги йўл чизмаси жорий этилди. Ташқи кўриниши сабабли халқ тилида «вафли чизмаси»даги чизиқлар ёрдамида ҳаракат йўналишида тирбандлик юзага чиққан ҳолатда чиқиш мумкин бўлмаган ҳудуд белгилаб олинади ва ҳайдовчи тўхташга мажбур бўлади.
Халқаро тажрибага кўра, ушбу чизманинг яна бир тури бор. У Амир Темур ва Осиё кўчалари кесишмасида («Қозоғистон» кинотеатри) ётқизилди. Чизма чорраҳа чегарасини белгилайдиган икки сариқ рангдаги чизиқларнинг кесишмаларидан иборат.
«Қайд этиш лозимки, икки турдаги чизманинг талаблари бир хил: йўллардаги тирбандликлар билан курашиш. Ушбу муаммо чорраҳаларда светофор ишламаган ҳолларда яққол кўзга ташланади. Ҳаттоки ЙПХ инспектори томонидан ҳаракат оқими бошқарилиб турганда ҳам баъзи автомобилчилар тегишли ишорани кутиб турмасдан «ўтиб кетмоқчи» бўлишади.
Бу эса автомобилларнинг тиқилиб қолишига ва кесиб ўтаётган кўчаларидан ҳаракатланишни бошлаган машиналарни йўли тўсиб қўйилишига олиб келади. Натижада ҳолат ушбу чорраҳани кесиб ўтмоқчи бўлган барча ҳайдовчилар учун муаммога айланади, уни ҳал қилиш учун эса қўшимча вақт талаб этилади», — дейилади ИИББ хабарида.
Шунингдек, хабарда қайд этилишича, бир нечта катта чорраҳаларда синов чизмаларидан ташқари ўнг томонга бурилувчилар учун «чўнтаклар» ташкил этилиб, чорраҳалардаги ҳолат янада енгиллашади. Ушбу имкониятларни ташкил этиш бўйича ишлар олиб борилмоқда. Бундан ташқари, ҳозирнинг ўзида кўплаб чорраҳаларда чизмалар ўнг томонга бурилиш учун имкон қолдирилган ҳолда ётқизилмоқда.
Изоҳ (0)