Тошкент вилояти Тошкент туманида жарима майдонига жойлаштирилган Damas автомобилини чиқариб бериш эвазига пора таклиф қилган ҳайдовчи қўлга олинди. Бу ҳақда вилоят ИИББ ахборот хизмати хабар берди.
Маълум қилинишича, 8 январь куни туман ҳудудида хизмат олиб бораётган ЙПХ катта инспектори сержант У.Ф ҳайдовчи А.А бошқарувидаги (2004 йилда туғилган) Damas русумли транспорт воситасини тўхтатиб, автомашинани тегишли ҳужжатларсиз ҳамда автомашина ойналарини тегишли рухсатномасиз қорайтирган ҳолда бошқариб кетаётганини аниқлаган. Унга нисбатан Маъмурий жавобгарлик тўғрисидаги кодекснинг 126 ва 135-моддаларига кўра маъмурий баённома расмийлаштириб, транспорт воситасини жарима майдонига жойлаштирилган.
Фуқаро А.А муаммо ечимининг ноқонуний йўлларини излаб, ходимга 3 кун давомида автомашинани жарима майдонидан чиқариш ҳамда ишини ижобий ҳал қилиб бериш эвазига унга 300 доллар миқдоридаги пулларни пора тариқасида таклиф қилган.
ЙПХ инспектори ушбу ҳолатда фуқарога пора бериш жиноят эканини тушунтиришига қарамай, унга тўхтовсиз пора таклиф қилаётгани тўғрисида Ички ишлар вазирлиги шахсий хавфсизлик бош бошқармаси Тошкент вилояти бўйича бошқармасига мурожаат қилган.
Ҳолат юзасидан 11 январь куни соат 17:30 ларда ИИВ шахсий хавфсизлик бош бошқармаси Тошкент вилояти бўйича бошқармаси ходимлари, туман прокуратураси ходимлари тезкор тадбир ўтказиб, фуқаро А.А.ни ЙПХ инспекторига 300 доллар ҳисобида 3 миллион сўм пулни пора сифатида бераётган вақтда қўлга олган.
Мазкур ҳолат юзасидан Тошкент туман прокуратураси томонидан Жиноят кодексининг 211-моддаси (пора бериш) билан жиноят иши қўзғатилган.
Аввалроқ Наманганда ЙПХ ходимига пора сифатида 1000 доллар ва 4 дона телевизор таклиф қилган ҳайдовчи ушлангани тўғрисида хабар берилганди.
Мавзуга доир:
Изоҳ (0)