Тошкент вилояти Бўстонлиқ туманида спиртли ичимлик ичгани аниқланган ҳайдовчи ЙПХ инспекторига пора бераётган вақтда қўлга олинди. Бу ҳақда вилоят ИИББ «Дарё»га хабар қилди.
Маълум қилинишича, 2020 йил 4 сентябрь куни Тошкент вилояти ИИББ ЙҲХБ ЙПХ махсус отряди командирининг ўринбосари, катта лейтенант А.Абдухолиқов Lacetti русумли транспорт воситасини тўхтатган. Текширув вақтида ҳайдовчи И.С. спиртли ичимлик истеъмол қилганлиги ва маст ҳолатда эканлиги аниқланган.
Катта лейтенант А.Абдухолиқов ҳайдовчига нисбатан тегишли тартибда маъмурий баённома расмийлаштириб, транспорт воситасини жарима майдонига олиб борган. Лекин фуқаро муаммо ечимининг ноқонуний йўлларини излаб, ходимга пора эвазига ишини ҳал қилиб беришини сўраган. А.Абдухолиқов бу ҳақда билдирги ёзиб Тошкент вилояти ИИББнинг Ўз хавфсизлик бўлимига мурожаат қилган.
Ҳолат юзасидан Ички ишлар бош бошқармасининг Ўз хавфсизлик хизмати ва Қибрай туман прокуратураси ходимлари йўл ҳаракати хавфсизлиги хизмати билан тезкор тадбир ўтказган. Натижада фуқаро И.С. ЙПХ ходимига 2 миллион сўм пулни пора сифатида бераётган вақтида қўлга олинган.
Мазкур ҳолат юзасидан Қибрай туман прокуратураси томонидан Жиноят кодексининг 211-моддаси билан жиноят иши қўзғатилди. Ҳозирда тергов ҳаракатлари олиб борилмоқда.
Изоҳ (0)