Қашқадарё вилоятининг Шаҳрисабз туманида собиқ ИИБ ходими, ЙПХ инспектори пичоқлаб ўлдирилди. Бу ҳақда Telegramʼдаги “Автоблог.уз” канали хабар берди.
Маълум бўлишича, воқеа 2025 йилнинг 1 июнь куни содир бўлган.
Ўктам ака Шаҳрисабз шаҳрида ЙПХ катта инспектори бўлиб ишлаган. 2014 йилда нафақага чиққанди, дейди блогер Мақсуд Музаффаров.
Аниқлаштирилишича, қотиллик воқеаси Шаҳрисабз шаҳри ҳудудидаги “Синабоғ” маҳалласида содир бўлган.
Ўктам акани қишлоқ одамлари Иван деб атовчи шахс пичоқлаган. Келишмовчилик нимадан келиб чиққани номаълум, дейди “Дарё”нинг бошқа манбаси.
Шаҳрисабз шаҳридаги ушбу маҳаллада яшовчи Элшод Яҳё исмли Facebook фойдаланувчиси ушбу воқеа ҳақида ёзар экан “Қачонлардир бизнинг маҳалла шаҳримизни титратган, мафия ва безорилар макони бўлгани сабабли бирорта бегона одам маҳаллага ўзидан ўзи келиши, юриши мумкин бўлмаган. Афсуски, ўша эски қон ҳамон оқаётгандек, баъзида ўзганинг, баъзан ўз қонини тўкиб туришади”, дейди.
Бош прокуратура ахборот хизмати раҳбари Ҳаёт Шамсутдиновнинг “Дарё”га билдиришича, қотиллик оқибатида вафот этган фуқаро 48 ёшда бўлган.
2025 йил 1 июнь куни Шаҳрисабз шаҳри “Синабоғ” маҳалласида яшаган Ўктам Хўжақулов бўйин соҳасидан ўткир тиғли жисм билан тан жароҳати етказилган ҳолда Шаҳрисабз шаҳар тез тиббий ёрдам бўлимига қотиллик аломатлари билан олиб келинган. Мазкур ҳолат юзасидан Шаҳрисабз тумани прокуратураси томонидан Жиноят кодексининг 97-моддаси 1-қисми (қасддан одам ўлдириш) билан жиноят иши қўзғатилиб, 37 ёшли гумонланувчи шахс Жиноят-процессуал кодексининг 221-моддаси тартибида ушланган, дейилади Бош прокуратура ахборотида.
Аввалроқ Тошкент вилоятининг Тошкент туманида, шунингдек, Тошкент шаҳрининг Янгиҳаёт туманида ўз хизмат вазифасини бажараётган профилактика инспекторлари пичоқланиши билан боғлиқ ҳолат содир бўлганди. Қолаверса, Жиззах вилоятининг Бахмал туманида ҳам алимент пулини ундириш учун борган МИБ ходими пичоқланганди.
Изоҳ (0)