Ижтимоий тармоқларда тарқалган видеода эвакуаторга ортилаётган машина ёнида ЙПХ инспекторидан кечирим сўраб, ялинаётган ҳайдовчи вазиятдан қутулиш учун ёлғон гапирганини тан олди. Бу ҳақда воқеа тафсилотларини ўрганган «Дарё» мухбири Фарҳод Норбўтаев маълум қилди.
«Ўша куни ҳақиқатан ҳам киракашлик қилаётган эдим, — дейди видеодаги ҳайдовчи Орзу Абдуллаев. — Кўчага чиқсам, бир киши ёнимга келиб манзилига олиб боришимни сўради. У одам маст экан. Унинг маст эканлигини ўша ердаги таксичилар ҳам кўрди. Маст фуқаро такси излаб, катта йўлга чиқиб кетди. Ҳатто машина уриб юборишига сал қолди. Шу боис уни манзилига олиб бориб қўймоқчи бўлдим. Йўлда ЙПХ инспектори тўхтатди. Инспекторга машинадаги одамни амаким деб айтдим, кейин қўшнимнинг амакиси, дедим. Вазиятдан қутилиш учун ёлғон гапирдим. Тўғриси, бунақа рейд бўлаётганини билмагандим. Хабарим йўқ эди».
Жорий йил 9 май куни ижтимоий тармоқларда тарқалиб, жамоатчилик муҳокамасига сабаб бўлган видеода ҳайдовчи Орзу Абдуллаев ЙПХ инспекторига киракашлик қилмаётганини, машинасидаги фуқаро қўнғироқ қилганлиги учун манзилига етказиб қўяётганини айтган. Шунингдек, турмуш ўртоғи операция бўлганлигини, шароити оғирлигини маълум қилган.
Самарқанд шаҳри, «Расадхона» маҳалласи, Ўрмон хўжалиги гузарида истиқомат қилувчи Орзу Абдуллаев отаси, турмуш ўртоғи ва бир нафар фарзанди билан яшайди. Россияда ишлаб топган пули эвазига рўзғор боқаётган Орзу Абдуллаев машинани қарзга олганлигини, қарзидан яқинда қутулганлигини айтди.
«Уйда тўрт ойлик фарзандим бор. Унинг овқати, ‘памперс’и учун пул керак эди. Дадам ишламайди, нафақахўр. Қолаверса, қанд касали бор. Мен мажбурликдан кўчага чиқдим», — дейди Орзу Абдуллаев.
Жамоатчилик муҳокамасига сабаб бўлган видеода ҳайдовчи турмуш ўртоғининг саломатлиги яхши эмаслигини, ҳозирда Самарқанд вилоят онкология диспансерида муолажа олаётганлигини ҳам айтган. «Дарё» мухбири билан суҳбатда Орзу Абдуллаев бу гапни инкор қилди.
«Турмуш ўртоғим шифохонада эмас. Тўрт ой аввал, аниқроғи, 2020 йилнинг 11 январь куни фарзандимиз жарроҳлик йўли билан туғилганлиги учун аёлимнинг операция қилинган жойи шамоллаган экан. Даволаш учун кўп харажат қилдим. Бор пулим турмуш ўртоғимни даволашга кетди. Мен аслида ўшани назарда тутгандим, — дейди Орзу Абдуллаев. — Турмуш ўртоғим онкология диспансерида ётганлиги ҳақида ким хабар тарқатганини билмайман»
«Расадхона» маҳалласи раиси Зокир Сафаровнинг таъкидлашича, Орзу Абдуллаевнинг оиласи кам таъминланган оилалар қаторига кирмайди.
«Оиланинг 10 сотих ери ва машинаси ҳам бор. Амалдаги қонунларга кўра, бундай фуқаролар кам таъминланган ёки эҳтиёжманд оилага кирмайди, — дейди маҳалла раиси Зокир Сафаров. — Бугунги кунда коронавирус пандемияси сабаб озиқ-овқат хавфсизлигини таъминлаш, томорқачиликни ривожлантириш талаби қўйилган. Шу сабаб оила томорқадан унумли фойдаланиб, даромад қилса бўлади. Иш масаласи муаммо бўлаётган бўлса, вақтинчалик иш билан таъминлашимиз мумкин. Истаса, ҳозирнинг ўзида ўша ишга жойлаштириб қўямиз. Аммо бу фуқаро бирор марта бизга шароитим оғир деб, иш сўраб мурожаат қилмаган»
Воқеани тасвирга олиб, ижтимоий тармоқда тарқатган Самарқанд вилоят транспорт бошқармаси автотранспорт ташувларини мувофиқлаштириш сектори инспектори Меҳриддин Алимов қилган иши учун узр сўради.
«Ўша кунги видеони ҳеч кимга сездирмасдан мен тасвирга олгандим. Эҳтиётсизлигим сабаб видео бошқарма ходимларининг Telegram’даги гуруҳида тарқалди. Кейин билсам, видео ижтимоий тармоқларда ҳам тарқаб кетган экан. Бундан менинг хабарим йўқ эди. Агар ўша фуқаро мени кузатиб турган бўлса, ундан узр сўрайман. Мен бундай бўлишини билмагандим. Ҳайдовчилардан илтимосим, карантин қоидаларини бузмасин. Ўша автомашина ҳайдовчисидан яна бир бор кечирим сўрайман», — дейди Меҳриддин Алимов.
Таъкидланишича, 8 май кунги рейдда Орзу Абдуллаевга карантин қоидаларига риоя қилмасдан йўловчи ташиш айби қўйилиб, ҳайдовчига нисбатан вилоят Санитария-эпидемиология назорати давлат инспекцияси ходими томонидан маъмурий баённома расмийлаштирилган.
«Фуқаронинг оилавий шароитини эътиборга оламиз. Агар ҳақиқатан ҳам турмуш ўртоғи операция бўлиб, бугунги кунда шароити оғирлашиб қолган бўлса, биз, албатта, ёрдам берамиз», — дейди Самарқанд вилоят Санитария-эпидемиология назорати давлат инспекцияси бошлиғи Шерзод Шомуродов.
Изоҳ (0)