Сурхондарё вилоятининг Шўрчи туманида яшовчи Абдураҳмон Қурбонов Сobalt ҳайдовчисининг айби билан содир этилган йўл-транспорт ҳодисаси оқибатида жабрланганини, бироқ айбдор ҳайдовчи ўз вақтида унга ёрдам кўрсатмагани сабаб бир кўзи умуман кўрмай қолганини айтмоқда.
Бу ҳақда «Дарё»га маълум қилган Абдураҳмон Қурбоновнинг айтишича, ЙТҲ 2020 йил 13 май куни Бойсун туманининг Дарбанд қишлоғида содир бўлган.
«Тошкент шаҳридаги қурилишлардан бирига ишга кетаётган кунимиз 2020 йил 13 май куни кечаси соат 12 ларда бизни олиб кетаётган Сobalt Бойсун туманининг Дарбанд қишлоғида «КаМАЗ»га урилди. Оқибатда йўловчи сифатида кетаётган шерикларим ва мен тан жароҳати олиб, шифохонага ётқизилдик. Мен бошқа йўловчиларга нисбатан оғир тан жароҳати олганим боис ҳушимни йўқотдим. Термиз шаҳридаги шифохонада 15 май куни ҳушимга келганимда нима бўлганини англаб етдим. Ўшандан буён даволаниб, соғлиғимни тиклаш билан овораман. Cobalt ҳайдовчиси эса менга моддий ёрдам беришдан бош тортмоқда», — дейди мурожаатчи Абдураҳмон Қурбонов.
Мурожаатчининг маълумот беришича, ЙТҲ содир бўлгач, Cobalt йўловчилари дастлаб Бойсун туманидаги шифохонага етказилган. Абдураҳмон Қурбоновдан бошқа йўловчиларнинг аҳволи нисбатан яхши бўлгани сабаб улар қолдирилиб, жабрланувчи Термиз шаҳридаги шифохонага олиб кетилган.
«Биз Бойсунга борганимизда акамнинг аҳволи оғир экан. Юз суяги ҳамда бурни синиб, қовоғи ёрилгани сабаб ҳушини йўқотган дейишди. Ҳушсиз ва аҳволи оғир акамни Бойсун туманидан Термиз шаҳридаги шифохонага олиб бордик. 15 май куни ҳушига келгач, операция қилишди. Аммо операциядан сўнг акамнинг бир кўзида муаммо борлиги, кўзи кўрмай қолгани маълум бўлди», — дейди жабрланувчининг укаси Абдурасул Қурбонов.
Маълум қилинишича, ЙТҲдан жабрланган Абдураҳмон Қурбонов юз жарроҳлиги операциясидан сўнг уйига қайтган. Юзидаги шишлар қайтгач, чап кўзи кўрмаётганини пайқаган ва шифокорга мурожаат қилган. Шифокор ЙТҲ оқибатида олган жароҳати сабаб кўз пардаси йиртилганини айтган.
«Шифокорнинг гапидан сўнг Cobalt ҳайдовчиси Абдукарим Абдумўминовга қўнғироқ қилиб, даволанишим учун керак бўлган харажатларни қоплашини, соғлиғимни тиклашда кўмаклашишини сўрадим. Тошкентга бориб, шифокорларга кўринишим лозимлигини айтдим. Аммо у вақти йўқлигини билдириб, уч миллион сўм бераман, ўзингиз даволаниб келинг, деди. Мен уч миллион сўм етмаслигини, ўзи бирга борса, қанча харажат кетса, қоплаб бериши лозимлигини айтдим. Бироқ у буни рад этди», — дейди ЙТҲ жабрланувчиси.
Ойдинлик киритилишича, Абдураҳмон Қурбонов Тошкент шаҳрига бориб, кўзини шифокорларга кўрсатганида тиббиёт ходимлари кўз пардасига шикаст етганини, энди кўзи кўрмай қолишини айтган. Шунингдек, операциянинг фойдаси йўқлигини маълум қилган.
«Шифокорлар тавсиясига кўра, операциядан сўнг кўзим ва бошдаги чайқалиш сабаб даволанишни давом эттирдим. Даволанишим давомида ҳайдовчига қўнғироқ қилиб, даволанишим учун кетаётган сарф-харажатларни қоплаши лозимлигини айтдим. У эса ёрдам беришдан бош тортди», — дейди Абдураҳмон Қурбонов.
Жабрланувчи Қурбоновнинг қўшимча қилишича, Cobalt ҳайдовчиси Ангор туманида яшовчи Абдукарим Абдумўминов барча харажатлар учун уч миллион сўм беришини, ундан ортиқ харажатни қоплай олмаслигини маълум қилган. Абдураҳмон Қурбонов эса айни кунга қадар даволаниши учун беш-олти миллион сўм харж қилганини айтмоқда.
«Ўтган тўрт ой муддат давомида ҳайдовчи харажатларимни қоплаб беришдан бош тортмоқда. Демак, унинг автомобили жарима майдонидан чиқариб юборилган. Шу сабаб ҳам ҳайдовчи менинг аҳволим билан қизиқмаяпти. Мен ЙТҲдан жабрланиб, соғлиғимни йўқотганим етмагандек ўтган фурсат давомида ишсиз ҳам қолдим. Бу эса менинг оилавий аҳволимга ҳам таъсир кўрсатмоқда. Мутасадди ташкилотларга мурожаат қилдим. Бироқ ҳеч ким дардимни тингламаяпти», — дейди Абдураҳмон Қурбонов.
«Дарё» мухбири билан суҳбатлашган ҳайдовчи Абдукарим Абдумўминовнинг айтишича, у жабрланувчининг сарф-харажатларини қоплаш ва ундан ҳеч қандай даъвоси йўқлиги ҳақида тилхат олиш учун унинг хонадонига борган.
«Менинг ҳам харажатларим кўпайиб кетгани сабаб жабрланувчининг харажатлари учун уч миллион сўм беришимни айтдим. Бироқ у рози бўлмади. Жабрланувчининг беш-олти миллион харажати бўлса, тўлаб бераман», — дейди Абдукарим Абдумўминов.
Ҳайдовчининг маълумот беришича, мазкур иш бўйича суд ҳам бўлиб ўтган.
«Мазкур ишни кўриб чиққан жиноят ишлари бўйича Бойсун туман суди жабрланувчининг кўзи ЙТҲ оқибатида жабрланганми ёки ундан илгари ҳам унинг кўзида муаммо бўлганми, шуни аниқлаш мақсадида суд экспертиза тайинлаш тўғрисида тўхтамга келди ва ишни кўришдан тўхтатди», — дейди Абдукарим Абдумўминов.
ЙТҲ жабрланувчиси Абдураҳмон Қурбоновнинг гапларига аниқлик киритиш мақсадида Сурхондарё вилоят ИИБ, Йўл ҳаракати хавфсизлиги бошқармаси ахборот хизмати раҳбари Элнур Абраев билан суҳбатлашдик.
«Мазкур ҳолат бўйича етарли маълумотга эга эмасман, аммо тез орада бу ҳақда аниқ маълумот бераман», деган Элнур Абраев саккиз кун ўтса-да, ҳеч қандай маълумот бермади. Вилоят ИИБ ахборот хизмати раҳбари Фарҳод Тошбоев эса телефон қўнғироқларга жавоб бермади.
Мазкур ҳолатни ўрганиш давомида юзага келган саволларимиз эса очиқ қолди.
Хўш, Ўзбекистон ҳудудида карантин тартиби давом этаётган пайтда — 2020 йил 13 май куни Сурхондарё вилоятининг Шўрчи туманидан 4 нафар йўловчи билан йўлга чиққан Cobalt ҳайдовчиси автомобиллар ҳаракати чекланган бўлишига қарамасдан қандай қилиб Бойсун туманининг Дарбанд қишлоғи ҳудудига етиб келди? Лицензиясиз йўловчи ташиган ҳайдовчининг ҳаракати ЙПХ ходимларига ошкор бўлгач, вилоят транспорт бошқармаси эътиборини тортмадими?
Ўйлаймизки, Сурхондарё вилоят ИИБ, ЙҲХБ ва транспорт бошқармаси мазкур саволларга тез орада жавоб беради ва муаммо ечими ҳақида хабардор қилади.
Изоҳ (0)