Мадриднинг “Реал” клуби ёзги трансфер ойнасида “Ливерпуль” ҳимоячиси Иброҳим Конатени харид қилиш вариантини кўриб чиқмоқда. Бу ҳақда Франциянинг L’Equipe нашри хабар берди.
Манбага кўра, “Реал” вакиллари аллақачон “Ливерпуль” билан боғланган ва футболчини қўлга киритиш учун қандай миқдордаги таклиф мерсисайдликларни қаноатлантириши мумкинлигини сўраган. Дастлаб, мадридликлар 25 ёшли франциялик ҳимоячи учун 20–25 миллион евро миқдорида таклиф юбориши мумкин. Бироқ “Ливерпуль” Конатени камида 50 миллион евро эвазига қўйиб юбориши мумкин.
Таъкидланишича, трансфер борасидаги музокараларга футболчининг шартномаси ҳам таъсир кўрсатиши мумкин. Конате ва “Ливерпуль” ўртасидаги битим 2026 йил ёзигача амал қилади. Инглиз клуби уни кейинги йил текинга қўйиб юбормаслиги учун шу ёздаёқ сотишга мажбур бўлиши мумкинлиги айтилмоқда.
Маълумот учун, Иброҳим Конате 2021 йилда Германиянинг “Лейпциг” клубидан “Ливерпуль”га ўтган. Футболчи ўтган мавсум “Ливерпуль” таркибида 39 учрашувда майдонга тушиб, 2 гол ва 2 ассист муаллифига айланган. Transfermarkt портали француз ҳимоячисининг нархини 60 миллион еврога баҳоламоқда.
Эслатиб ўтамиз, “Реал” ёзги трансфер ойнаси пайтида “Ливерпуль”нинг англиялик ҳимоячиси Трент Александр-Арнольдни эркин агент сифатида ўз сафига қўшиб олган эди.
Изоҳ (0)