Тошкентдаги хусусийлаштирилган International меҳмонхонаси Россиянинг Azimut Hotels меҳмонхоналар тармоғи бошқарувига берилади. Бу ҳақда компания вакилига таяниб “Ведомости” нашри хабар берди.
Хабарда айтилишича, ушбу меҳмонхона номи Azimut Grand Hotel Ташкент деб ўзгартирилади. Бу Azimut’нинг Марказий Осиёдаги биринчи беш юлдузли меҳмонхонаси ва Ўзбекистондаги иккинчи лойиҳаси бўлади.
2024 йил июль ойида Azimut Hotels Тошкентнинг Шота Руставели кўчасида тўрт юлдузли меҳмонхона очганди. Spot’нинг ёзишича, у Azimut Hotels томонидан бошқарилсада, меҳмонхона компания мулки эканлигини англатмайди.
International меҳмонхонаси ҳақида
Ушбу меҳмонхона 2024 йилнинг май ойида сотувга қўйилганди. Меҳмонхона 232 та хона, 7 та конференс зал, 2 та ресторан, барлар, ёзги терраса, фитнес-клуб ва бассейнни ўз ичига олади. Умумий 3 гектар ер майдонида 44,903 квадрат метр бино ва иншоотлар жойлашган.
2024 йил 19 апрелда қабул қилинган президент қарорига кўра, 7 та йирик компаниядаги, шу жумладан, InterHotel МЧЖдаги давлат улушлари профессионал консултантларни жалб қилган ҳолда, 2025 йилнинг охиригача халқаро бозорда оммавий савдоларга чиқарилиши белгиланганди.
2024 йилнинг ноябрида ушбу меҳмонхонани сотиб олиш учун энг юқори нарх таклифини билдирган Smart Fast Stroy МЧЖ 26 млн АҚШ доллари миқдорида сотиб олиш тўловини тўлаш шарти билан савдо ғолиби деб топилганди.
Изоҳ (0)